हेटौंडा, २१ माघ । हेटौंडाकी तेस्रो लिंगी अजिता भुजेलको बलात्कारपछि हत्या गरेको आरोपमा पाँचजना पक्राउ परेका छन् । घटनाको १७ दिनपछि मंगलबार प्रहरीले भुजेलको हत्यामा संलग्न पाँच जनालाई पक्राउ गरी सार्वजनिक गरेको छ ।
हत्या अभियोगमा प्रहरीले पक्राउ गरि हेटौंडा–९ का १८ बर्षीय सिमोन परियार, हेटौंडा ४ का २५ बर्षीय सुशील थापा मगर, हेटौंडा ११ की २० बर्षीया एलिसा पाख्रिन, हेटौंडा ४ का २४ बर्षीय आशिष बल र हेटौंडा ४ का २१ बर्षीय बुद्ध लामालाई सार्वजनिक गरेको हो । उनीहरूले थानाभञ्याङमा ना ६ ख ६५२७ नम्बरको ट्रकभित्र भुजेलको हत्या गरेर क्याम्पाडाँडामा लगेर फालेको अनुसन्धानबाट खुलेको प्रहरीले जानकारी दिएको छ ।
घटनाको थप अनुसन्धान भइरहेको र प्रमाणित भए मुलुकी अपराध ऐन २०४७ को परिच्छेद १२ को ज्यान सम्बन्धी कसुरमा दुबैलाई जन्मकैद सम्म हुने प्रहरीको भनाई छ ।
यहि माघ ४ गते हेटौडाको क्याम्पाडाँडामा अजिता मृत फेला परेकी थिईन् । त्यसपछि २ सय ५० जना भन्दा बढी शंकास्पद व्यक्तिलाई सोधपुछ तथा अनुसन्धानपछि हत्यारा पत्ता लागेको मकवानपुर प्रहरीले बताएको छ ।
