काठमाडौं, १६ माघ । एक महिलालाई यौन दुर्व्यवहार गरेको आरोप लागेपछि संघीय प्रहरी कार्यालय धरानका प्रमुख एसएसपी सौरभ राणालाई गृहमन्त्रालयले निलम्बन गरेको छ ।
धरानकी एक महिलाले राणाविरुद्ध मन्त्रालयमा उजुरी गरेको बताइएको छ । उनको उजुरीबारे प्रारम्भिक छानबिन भएपछि राणालाई निलम्बन गरिएको मन्त्रालयले जनाएको छ ।
उनी पदमा वहाल हुँदा अनुसन्धानको लागि आवश्यक प्रमाणहरु नष्ट हुनसक्ने भएकोले निलम्बन गरिएको मन्त्रालयले जनाएको छ । गृहमन्त्रालयले राणाबारे आवश्यक अनुसन्धान गर्न प्रहरी प्रधान कार्यालयलाई पत्राचारसमेत गरेको छ । एसएसपी राणा एसपी हुँदा जिल्ला प्रहरी कार्यालय सुनसरीमा कार्यरत थिए ।
