काठमाडौं, २४ पुस । नेपाली कांग्रेसका सभापति शेरबहादुर देउवाले विभिन्न जिल्ला सभापतिहरुसँग छलफल गर्नुभएको छ । पार्टीका वरिष्ठ नेता रामचन्द्र पौडेलको निमन्त्रणमा काठमाडौं आएका जिल्ला सभापतिहरुसँग देउवाले भेटवार्ता गर्नुभएको हो ।
देउवाले जिल्ला सभापतिहरुलाई चियापानका लागि निम्ता गर्नुभएको थियो । सभापति देउवासँगको भेटमा जिल्ला सभापतिहरुले आफ्नो असहमतिका कुरा राखेको जुम्ला जिल्ला सभापति दीपबहादुर शाहीले बताउनुभयो ।
सदस्यता वितरणसम्बन्धि विधानको धारा निलम्बन गरेको र महाधिवेशनको कार्यतालिकाका विषयमा आफुहरुले असन्तुष्टि राखेको उहाँले बताउनुभयो । उहाँले भन्नुभयो, ‘पार्टीको सदस्यता भातृ संगठनहरुले बाँड्ने सक्ने भनिएको छ । नेपाल विद्यार्थी संघ र तरुण दलले आफ्नो सदस्यता बाँड्न नसकिरहेको अवस्थामा पार्टीको सदस्यता कसरी बाँड्छ ?’
दिनप्रतिदिन जिल्ला सभापतिहरुको हक कटौती भइरहेको विषयमापनि आफुहरुले कुरा राखेको उहाँले बताउनुभयो । जिल्ला सभापतिहरुसँगको भेटमा देउवाले महाधिवेशनको मिति परिवर्तन गर्न नसकिने तर अरु विषयमा छलफल गरेर सहमतिको प्रयास गर्ने आश्वासन दिएको उहाँले बताउनुभयो ।
वरिष्ठ नेता पौडेलले बोलाएको भेलामा आउने अनि मलाई नबोलाउने भनेर सभापति देउवाले चित्त दुखाउनुभएको उहाँले बताउनुभयो । ‘मसँग हार्ने रामचन्द्र पौडेलले बोलाएर तपाईहरु आउने ? अनि त्यो बैठकमा आउँदै गर्दा मलाई किन खवर गर्नुभएन ? तपाईहरु देखि मेरो चित्त दुख्यो । सभापति देउवाको भनाई उद्घृत गर्दै शाहीले भन्नुभयो, ‘भोली तपाईहरु विरुद्ध लड्ने व्यक्तिले हारेपछि यसरी भेला बोलायो भने तपाईहरुको के हालत हुन्छ ?’
ललितपुर जिल्ला सभापति मदन आमात्यले कांग्रेस एकजुट भएर अगाडी बढ्नुको विकल्प नभएको बताउनुभएको छ । भेटपछि सञ्चारकर्मीहरुसँग कुरा गर्दै उहाँले सभापतिले भागवण्डाका आधारमा नभएर स्वतन्त्र ढंगबाट निर्णय गर्नुपर्ने सुझाव दिनुभयो ।
वरिष्ठ नेता पौडेलले बेलाउनुभएको भेलामा सहभागि भएका जिल्ला सभापतिहरु र नभएको जिल्लाका सभापतिहरु पनि देउवासँगको भेटघाट कार्यक्रममा सहभागि हुनुहुन्थ्यो ।
पार्टी प्रवक्ता विश्वप्रकाश शर्माले संवादबाट सहमित र सहमतिबाट महाधिवेशन भन्ने भावना जिल्ला सभापतिहरुको रहेको बताउनुभयो । अहिलेको अवस्थामा पार्टी एकमत भएर अगाडी बढ्न जरुरी रहेको जिल्ला सभापतिहरुको निष्कर्ष रहेको उहाँले बताउनुभयो ।
नेपाली कांग्रेसको पुष ११ गते बसेको केन्द्रीय कार्यसमितिको बैठकले बहुमतको आधारमा २०७७ फागुन ७ देखि १० गते सम्म महाधिवेसन गर्ने, विभागहरुको संख्या ४७ पु-याउने निर्णय गरेपछि वरिष्ठ नेता पौडेल समूहले असन्तुष्टि थियो । पौडेलले संस्थापन पक्षले एकलौटी निर्णय गरेको भन्दै जिल्ला सभापतिहरुको भेला बोलाउनुभएको थियो । भेला तीन दिनसम्म चलेको थियो ।
