काठमाडौं, ७ कात्तिक । नेपाली कांग्रेसका बरिष्ठ नेता रामचन्द्र पौडेलले नेपालका कम्युनिष्टहरुसंग सैद्धान्तिक र बैचारिक बहस गर्नु आवश्यक रहेको बताउनुभएको छ।
नेपाल वित्तिय संस्था कर्मचारी संघले बडा दशै, दीपावली, छठ एवं नेपाल सम्बत्का अवसरमा विहिबार राजधानीमा गरेको कार्यक्रमलाई सम्बोधन गर्दै नेता पौडेलले मुलुकलाई बचाउनका लागि कम्युनिष्टहरुसंग नेपाली कांग्रेसले बैचारिक बहस चलाउनुपर्ने बताउनुभएको हो ।
उहाँले कम्युनिष्टहरुले गरेको प्रतिवद्धता अनुसार काम हुन नसकेको भन्दै विगतमा उनीहरुले गरेको प्रतिवद्धता र वर्तमान कार्यशैलीका बारेमा व्यापक बहसको आवश्यकता रहेको बताउनुभयो ।
सरकारको कार्यशैलीका कारण मुलुकमा विभिन्न जातिवाद र अराजनीतिक कुराहरु उठिरहेको र त्यस्ता गतिविधिका कारण समाज असान्त र बेचैनिको अवस्थामा रहेको टिप्पणी उहाँले गर्नुभयो । उहाँले कम्युनिष्टसंग बैचारिक बहस गरी मुलुकलाई सिद्धान्त र विचारको राजनीतिमा डोर्याउनुपर्ने बताउनुभयो ।
नेता पौडेलले पार्टी भित्रै पनि निष्ठा, आदर्श र मुल्य मान्यताको राजनीतिलाई जोगाउनुपर्ने आवश्यकता औल्याउनुभयो । हिंसा र अशान्तिलाई निरुत्साहीत गर्दै मुलुकलाई स्वच्छ बाटोमा डोर्याउने सन्दर्भमा पार्टी भित्र पनि सबै इमान्दार बन्नुपर्ने र लोकतन्त्रको रक्षा गर्ने अभिभारा कांग्रेसले लिनुपर्ने बताउनुभयो । उहाँले लोकतन्त्रको रक्षाका लागि कांग्रेस आन्तरिक रुपमा पनि मजबुत हुनुपर्ने आवश्यकता औल्याउनुभयो ।
