कपिल अधिकारी
रुपन्देही, ९ असोज । रुपन्देहीको तिलोत्तमा नगरपालिकाले स्थानीयतहको आयोजनामा पहिलो पटक लगानी सम्मेलन आयोजना गरेको छ । आयोजकले दाबी गरे अनुसार स्वदेशी र बिदेशी लगानीकर्ताहरु नदेखिएपनि सम्मेलनपछि अपेक्षा गरिए अनुसार लगानी आउने आयोजकको दावी छ ।
सम्मेलनको आयोजना गर्ने घोषणा गर्दा नगरपालिकाले ५० अर्व बढीको लगानी भित्र्याउने तथा चिन, नेपाल र भारतबाट ठूलो संख्यामा लगानीकर्ताको उपस्थिती रहने बताएपनि सम्मेलनको उद्घाटनका दिनसम्म ती देशहरुबाट लगानीकर्ताको उपस्थिती भने नगन्य पाईएको छ ।
निकै महत्वाकांक्षी अपेक्षाका साथ स्थानीय सरकारको तर्फबाट गरिएको पहिलो लगानी सम्मेलनको नेकपाका अध्यक्ष तथा पुर्वप्रधानमन्त्री पुष्पकमल दाहाल प्रचण्डले उदघाटन गर्नु भयो ।
सम्मेलनको उद्घाटन गर्दै अध्यक्ष प्रचण्डले संघियतामाथि चौतर्फी आक्रमण भएको बेला स्थानीयतहले आफै अग्रसर भएर लगानी सम्मेलन गर्नु आफैमा उपलब्धी भएको बताउनु भयो ।
सम्मेलनको आयोजक तिलोत्तमा नगरपालिकाका प्रमुख बासुदेव घिमिरे भने लगानी सम्मेलनले गणीतिय हिसावमा ठ्याक्कै यती लगानी हुन्छ भन्न नसकिने बताउनु हुन्छ ।
तैपनी ५० अर्व बढीको लगानी नगरमा भित्रीने र ठूलो संख्यामा तिलोत्तमामा लगानीकर्ताहरुको लगानी आउनेमा नगरपालिका ढुक्क देखिन्छ ।
नेपालमा यस अघि नै ३ पटक केन्द्रिय तहमा लगानी सम्मेलन भई सकेकाछन् । संघीय संरचना नबन्दै २ पटक र गत चैत्रमा वर्तमान ओली सरकारकै नेतृत्वमा १ पटक केन्द्रिय तहमा लगानी सम्मेलन भईसक्दा स्थानीय तहमा भने तिलोत्तमा नगरपालिकाले आयोजना गरेको लगानी सम्मेलन पहिलो हो ।
स्थानीयतहको अग्रसरतामा गरिएको यस लगानी सम्मेलनले संघिय ब्यवस्था गलत नै छ भनेर प्रचार गर्ने तप्कालाई जवाफ मात्र फर्काएको छैन स्थानीयबासीमा पनि उत्साह थपिदिएको छ ।
