काठमाडौं, १९ भदौ । राष्ट्रिय प्रजातन्त्र पार्टी नेपालका अध्यक्ष कमल थापाले सरकारले जनतालाई सकारात्मक परिवर्तनको अनुभुति दिलाउन नसकेको आरोप लगाउनु भएको छ ।
गण्डकी प्रदेश स्तरीय बिस्तारित बैठकमा सहभागी हुन नवलपुरको कावासोती जाने क्रममा भरतपुर बिमानस्थलमा पत्रकारहरुसंग कुराकानी गर्दै अध्यक्ष थापाले यस्तो भन्नु भएको हो ।
उहाँले नेकपा नेतृत्वको सरकारले बिगतका गल्ती कमजोरी सच्याउन तर्फ कुनै पहलकदमी नदेखाएकोले देशमा अहिले बेरोजगारी, भ्रष्ट्राचार र धर्म परिवर्तन अत्यन्तै डरलाग्दो रुपमा बढ्दै गएको दाबी गर्नुभयो ।
साथै उहाँले एनसेल कर छलिमा अर्बौं रुपैयाँ घोटाला भएको र सो प्रकरणका दोषीलाई उन्मुत्ती दिने कार्य पटक पटक भैरहेकोले यसबारे संसदले छानबिन गर्नुपर्ने धारणा ब्यक्त गर्नुभयो ।
