मोरङ, २० भदौ । मोरङको बेलबारीमा मोटरसाइकल एकापसमा ठोक्किँदा चारजना गम्भीर घाइते भएका छन्।
बेलबारी नगरपालिका–८ चिसाङखोला नजिकै गएराति पश्चिमबाट पूर्वतर्फ आउँदै गरेको को ७ प २५५९ नम्बरको मोटरसाइकल र विपरीत दिशाबाट आउँदै गरेको को २५ प ५३५४ नम्बरको मोटरसाइकल आपसमा ठोक्किँदा चारजना गम्भीर घाइते भएको इलाका प्रहरी कार्यालय, बेलबारीका प्रहरी निरीक्षक रामजी कटुवालले जानकारी दिए।
दुर्घटनामा को ७ प २५५९ नम्बरको मोटरसाइकलमा सवार मोरङ कानेपोखरी गाउँपालिका-२ बस्ने ३० वर्षीय अम्बिका कोइराला, उनकै श्रीमती २८ वर्षीया सम्झना कोइराला, छोरा दुई वर्षीय असन कोइराला र को २५ प ५३५४ नम्बरको मोटरसाइकलमा सवार धनकुटा राजारानी–६ बस्ने ४४ वर्षीय रुद्र लिम्बू घाइते भएका हुन्।
घाइते चारैजनाको विपी कोइराला स्वास्थ्य विज्ञान प्रतिष्ठान धरानमा उपचार भइरहेको छ।
