काठमाडौं, १० बैशाख । प्रेमकथानक फिल्म “हजार जुनीसम्म”मा समाविष्ट ‘एमजी रोडैमा’ बोलको गीत सार्वजनिक गरिएको छ । विकासराज आचार्य निर्देशित फिल्मको सो गीत सोमबार राजधानीमा प्रेसमिट गरी दर्शकमाझ ल्याइएको हो ।
राजनराज सिवाकोटी र मेलिना राईले गाएको गीतको शब्द र संगीत पनि राजनराजकै हो । कविराज गहतराजले कोरियोग्राफी गरेको गीतको भिडियोमा स्वस्तिमा खड्का, सलोन बस्नेत र नवअभिनेता अखिलेश प्रधानले डान्स गरेका छन् ।
गीत सिक्किमको एमजी रोडमै खिचिएको हो । साउन ३० गते प्रदर्शन हुने फिल्मको कार्यकारी निर्मातामा कविता रेग्मी छिन् । पुरुषोत्तम प्रधानले खिचेको फिल्ममा स्वस्तिमा, सलोन, अखिलेशका साथमा आर्यन सिग्देल, प्रियंका कार्की, अनुभव रेग्मीलगायतले अभिनय गरेका छन् ।
