काठमाडौँ ।
भदौ १० गते आएको विनाशकारी बाढीका कारण रसुवास्थित माथिलो त्रिशूली–३ ‘ए’ जलविद्युत आयोजनाको सुरुङभित्र थुनिएका मेकानिकल सुपरभाइजर कवीर महर्जन स्वास्थ्यमा सुधार आएपछि अस्पतालबाट डिस्चार्ज हुनुभएको छ । मृत्युलाई नजिकबाट देखेर १० दिनपछि सकुशल उद्धार गरिएका महर्जनले आफ्नो जीवनको कठिनतम समयको अनुभव बाँड्दै सुरुङभित्रको त्यो भयानक संघर्षबारे सुनाउनु भयो । भदौ १० गते बिहानको समयमा आयोजनाको कन्ट्रोल रुममा काम गरिरहँदा महर्जन र उहाँका सहकर्मी सञ्जय साह अचानक आएको बाढीको चपेटामा पर्नुभएको थियो । सीसीटीभी फुटेजमा बाढीको संकेत देखेपछि हात समातेर बाहिर निस्कने उहाँहरुको प्रयास पानीको तिब्र बहावका कारण विफल भयो र दुवै जना सुरुङभित्र अलग–अलग स्थानमा फस्नुभयो । उद्धार भएपछि घर फर्कनुभएका महर्जनले लामो समयसम्म अन्धकारमा बस्दा सुरुङभित्र फसेको कुरा समेत बिर्सिसकेको बताउनु भयो ।
६–७ वर्षदेखि सोही आयोजनामा कार्यरत रहेकाले आफू रहेको स्थानसम्म पानी नआउनेमा उहाँ विश्वस्त हुनुहुन्थ्यो । जसले गर्दा उहाँलाई बाँच्न थप हौसला मिलेको थियो । अन्ततः १० दिनपछि टाढाबाट बलेको बत्ती र उद्धारकर्ताहरूको मानिसको आवाज सुन्दा महर्जनले आफू जीवित भएको महशुस गर्नुभयो । उद्धार टोलीले पहिला सहकर्मी सञ्जय साहलाई र त्यसपछि उनलाई उद्धार गरेको थियो । अस्पतालबाट डिस्चार्ज भएपछि महर्जनले आफ्नो उद्धारका लागि खटिने नेपाली सेना, नेपाल प्रहरी र सरोकारवाला निकायप्रति कृतज्ञता व्यक्त गर्नुभयो । उहाँ हाल शारीरिक रूपमा स्वस्थ भएपनि मानसिक आघातबाट पार पाउन ‘थेरापी’ लिइरहनुभएको छ । परिवारसँगको पुनर्मिलनलाई उहाँले आफ्नो जीवनको सबैभन्दा ठूलो खुशीको क्षण भएको बताउनु भयो ।
