सरकारले सुशासन र सदाचारमा ध्यान दिन सकेनः सांसद सुनार

काठमाडौं ।  नेपाली कम्युनिष्ट पार्टीका सांसद सांसद भुवनबहादुर सुनारले सरकारले सुशासन र सदाचारको क्षेत्रमा पर्याप्त ध्यान दिन नसकेको भन्दै चिन्ता व्यक्त गर्नुभएको छ ।
सोमवार विकास, आर्थिक मामिला तथा सुशासन समितिको बैठकमा ‘राष्ट्रिय सदाचार नीति, २०८३’ को कार्यान्वयनका सम्बन्धमा भएको छलफलमा उहाँले यस्तो बताउनुभएको हो । सांसद सुनारले सरकारका हालसम्मका गतिविधिहरू सुशासन र सदाचारको मर्मअनुरूप नदेखिएको टिप्पणी गर्नुभयो । नीति कार्यान्वयनको प्रक्रिया सहज नभए पनि यसलाई दृढताका साथ अगाडि बढाउनुपर्नेमा उहाँले जोड दिनुभयो । विगतमा विद्यालयको पाठ्यक्रममा नैतिक शिक्षा समावेश हुने गरेको स्मरण गर्दै उहाँले वर्तमान समयमा यसको सान्दर्भिकता अझ बढेको उल्लेख गर्नुभयो ।
उहाँले भन्नुभयो, ‘सरकार नयाँ भएर हो वा राजनीतिक असहजताका कारण, तर सुशासन र सदाचारमा जुन स्तरको ध्यान दिनुपर्ने थियो, त्यो पुगेको देखिँदैन । सरकारका काम–कारबाहीहरू अझै पनि पूर्ण रूपमा सदाचारी र सुशासनमैत्री हुन सकेका छैनन् । पछिल्लो समय समाजमा बढ्दो विकृति, विसङ्गति र अराजकतालाई नियन्त्रण गर्न नैतिक शिक्षा र सदाचारको ठूलो महत्व छ ।’
प्रश्तावित नीतिलाई दस्ताबेजमा मात्र सिमित नराखी वडा तहसम्मै जिम्मेवार अधिकारी तोकेर कार्यान्वयन गर्नुपर्ने उहाँको सुझाव छ । नीतिगत व्यवस्थालाई तल्लो तहसम्म प्रभावकारी रूपमा लैजानसके मात्र एउटा सुन्दर र सभ्य समाजको निर्माण सम्भव हुने उहाँले विश्वास व्यक्त गर्नुभयो ।