दक्षिण कोरियाको बुसानमा युनेस्को विश्व सम्पदा समितिको ४८ औँ महासभा शुरु

दक्षिण कोरियाको बुसान शहरमा आईतवारदेखि युनेस्को विश्व सम्पदा समितिको ४८ औँ महासभा शुरु भएको छ । नयाँ विश्व सम्पदाहरूको मनोनयन तथा सांस्कृतिक एवं प्राकृतिक सम्पदाहरूको संरक्षणका विषयमा छलफल गर्न आयोजित यस सत्रमा विश्वभरका करिव ३ हजार प्रतिनिधिको सहभागिता रहेको छ । उद्घाटन समारोहलाई सम्बोधन गर्दै युनेस्कोका महानिर्देशक खालेद एल–एनानीले विश्व सम्पदा विगतको विरासत मात्र नभई वर्तमानका लागि प्रेरणाको जीवन्त स्रोत भएको बताउनु भयो । यस सत्रलाई एकताको महत्त्वपूर्ण क्षणका रूपमा चित्रण गर्दै उहाँले साझा चुनौतीहरूको सामना गर्न र मानवताको साझा सम्पदाको रक्षाका लागि सदस्य राष्ट्रहरूलाई एकजुट भएर काम गर्न आह्वान गर्नुभयो । यसैगरी, दक्षिण कोरियाली राष्ट्रपति ली जे म्योङले विश्व सम्पदाले राष्ट्रिय सीमा र पुस्तालाई जोड्ने उल्लेख गर्दै यसलाई मानवताको साझा मूल्य र शान्तिपूर्ण अन्तर्राष्ट्रिय सहयोगको आधार स्तम्भका रूपमा परिभाषित गर्नुभयो । बढ्दो द्वन्द्व र विभाजनको वर्तमान समयमा सांस्कृतिक संवादको महत्व झन् बढेको चर्चा गर्दै राष्ट्रपति लीले भन्नुभयो, ‘विश्वसँगको ऐक्यवद्धतामा हामी मानवताको शान्तिपूर्ण र समृद्ध भविष्य निर्माणका लागि युनेस्कोसँग मिलेर काम गर्नेछौँ ।’
यस बैठकले विश्व सम्पदा सूचीमा समावेश हुनका लागि आएका ३० वटा नयाँ मनोनयनहरू, मौजुदा सम्पदाहरूको परिमार्जनसम्बन्धी ३ वटा प्रश्ताव र सूचीमा सूचीकृत भइसकेका १४७ वटा सम्पदाहरूको संरक्षण अवस्थाबारे विस्तृत समीक्षा गर्नेछ । बैठकमा विभिन्न सदस्य राष्ट्रका प्रतिनिधि, पर्यवेक्षक संस्था, गैरसरकारी संस्था र प्राज्ञिक क्षेत्रका विज्ञहरूले विश्व सम्पदा महासन्धिको कार्यान्वयन, सम्पदाहरूको व्यवस्थापन र संरक्षणका विविध पक्षमा छलफल गर्ने कार्यक्रम रहेको छ। हाल विश्वभर ९७२ सांस्कृतिक, २३५ प्राकृतिक र ४१ मिश्रित गरी कूल १,२४८ वटा विश्व सम्पदाहरू रहेका छन् ।