काठमाडाैं । बुधबार सामान्य घटेको शेयर बजार बिहीबार भने उच्च अङ्कले ओरालो लागेको छ । साताको पाँचौ कारोबार दिन शेयर बजार परिसूचक नेप्से २४ दशमलव ७६ अङ्कले घटेर २ हजार ६ सय २८ दशमलव ९१ विन्दुमा झरेको हाे।
यसदिन सबै समूहको शेयर घटेकोमा व्यापार समूहको शेयर झन्डै साढे २ प्रतिशतले ओरालो लागेको छ ।
यस्तै, विकास बैंक, जलविद्युत, उत्पादन, लघुवित्त, अन्य समूहको शेयर एक प्रतिशतभन्दा धेरैले घटेको छ । बिहीबार प्योर इनर्जी, रसुवागढी हाइड्रोपावर र भूगोल इनर्जी डेभलपमेन्ट कम्पनीको शेयर १० प्रतिशतले ओरालो लागेको छ ।
बजार उच्च अङ्कले घटेको दिन पञ्चकन्या माई हाइड्रोपावर कम्पनीको शेयर भने झन्डै १० अङ्कले बढेको छ । नेप्से घटे पनि कारोबार रकम भने बढेको छ ।
बुधबार ७ अर्ब ६५ करोडको कारोबार भएकोमा बिहीबार भने ३ सय १४ वटा कम्पनीका २ करोड (४ लाख कित्ता शेयर) ११ अर्ब २३ करोड रुपैयाँमा किनबेच भएको छ ।
