२०८१,१०,१६
प्रतिनिधिसभा सदस्य योगेशकुमार भट्टराईले पाथीभरा केबलकार निर्माणका क्रममा भएको झडपमा घाइते भएकाको उपचारको व्यवस्था गरी वार्ताबाट समस्या अविलम्ब समाधान गर्न माग गरेका छन् । आज काठमाडौँमा पत्रकार सम्मेलन गर्दै ताप्लेजुङमा निर्माणाधीन पाथीभरादेवी मुकुम्लुङ केबलकार सम्बन्धमा धारणा सार्वजनिक गर्दै ताप्लेजुङ जिल्लाका सांसद भट्टराईले यस्तो माग गरेका हुन्। उनले लोकतन्त्रमा विरोध र असहमति राख्ने अधिकार सबैको भएको भए पनि शान्तिपूर्वक र सभ्य हुनुपर्ने बताए। उनले केबलकार निर्माण कम्पनी र स्थानीयको समस्याको समाधान वार्ता र संवादको माध्यमबाट गरिनुपर्ने बताए। उनले परिस्थिति उत्तेजित बनाउने र सामाजिक सदभाव भड्किने खालका गतिविधिले कसैको हित नगर्ने भन्दै आन्दोलनरत पक्षलाई बन्द हड्तालका कार्यक्रम फिर्ता लिन आग्रह गरे।
उनले सरकारसँग पनि गिरफ्तार भएका व्यक्तिहरुलाई रिहा गरी घाइतेहरुको उपचारको व्यवस्था गर्न माग गरे। उनले केबलकार कम्पनीबाट प्राप्त हुने सामाजिक उत्तरदायित्व कोष, राजश्व, स्थानीय करलगायत आर्थिक कोष परिचालनका लागि स्थानीय तहको नेतृत्वमा आन्दोलनकारीको समेत प्रतिनिधित्व हुनेगरी सर्वपक्षीय समिति निर्माण गर्नुपर्ने बताए। उनले केबलकार निर्माण सम्बन्धमा अनुगमन गर्न अर्को समिति गठन गरी काम कारबाहीलाई सहभागीतामूलक तथा पारदर्शी ढंगले अघि बढाउन माग गरे। उनले सरकारले थप बजेटको व्यवस्था गरी स्थानीय संस्कृतिका जगेर्ना र संवर्द्धनका लागि मुकुम्लुङ पार्क तथा संग्रहालय निर्माणका साथै धर्म र संस्कृतिको उत्थानका लागि विभिन्न क्रियाकलाप अघि बढाउन माग गरे।
‘लोकतन्त्रमा विरोध र असहमति राख्ने अधिकारको म सम्मान गर्दछु‚ त्यो शान्तिपूर्वक र सभ्य हुनुपर्दछ। समस्याको समाधान वार्ता र संवादको माध्यमबाट गरिनुपर्दछ‚’ उनले भने, ‘परिस्थितिलाई उत्तेजित बनाउने र सामाजिक सदभाव भड्किने खालका गतिविधिले कसैको हित गर्दैन। यसका लागि आन्दोलनरत पक्षलाई बन्द हड्तालका कार्यक्रम फिर्ता लिन, सरकारलाई गिरफ्तार भएका व्यक्तिहरु रिहा गर्न, घाईतेहरुको उपचारको व्यवस्था गर्न माग गर्दै अविलम्ब वार्ता गरी समस्यालाई समाधान गर्न माग गर्दछु।’
उनले केबलकार कम्पनीले ताप्लेजुङका ७० वर्षमाथिका ज्येष्ठ नागरिक तथा १० वर्षमुनिका बालबालिका तथा अपाङ्गहरुका लागि निःशुल्क सेवा दिने घोषणा गर्नुपर्ने बताए। सांसद भट्टराईले प्रभावित क्षेत्रका नागरिकहरुलाई सुलभ शेयरको व्यवस्था गर्नुपर्ने बताए। उनले पाथीभरा केबलकार निर्माण निर्वाध अघि बढाउँदै निर्माण कम्पनीले उपलब्ध गराउने सामाजिक उत्तरदायित्व कोष स्थापना गर्नुपर्ने बताए। संघीय सरकार‚ प्रदेश सरकार र स्थानीय तहबाट कानूनी प्रक्रिया पूरा गरेर पाथीभरा देवी मुकुम्लुङ केबलकार कम्पनीले ताप्लेजुङमा अवस्थित पाथीभरामा केबलकार निर्माणको काम शुरु गरेको उल्लेख गरे।
पाथीभराको मुख्य मन्दिरभन्दा करिब ८ सय मिटर बाहिर केबलकार स्टेशन निर्माण हुने बताए। उनले पाथीभराको टुप्पोमा कुनै होटल वा रेष्टुरेण्ट नबन्ने र बन्न नदिने प्रतिबद्धता जनाए। उनले रुख तथा पोल गरेर २ हजार ११२ कटान हुने भन्दै बाहिर प्रचार गरिए जस्तो २५ हजार रुख काट्ने हल्लामा कुनै सत्यता नभएको बताए।
