पौष २० शनिबार
नेकपा माओवादी केन्द्रको आज बस्ने भनिएको स्थायी कमिटीको बैठक स्थगित भएको छ । दिउँसो २ बजे बस्ने भनिएको बैठक अध्यक्ष प्रचण्डसहित शीर्ष नेताहरुरुको कार्यव्यस्तताको कारणले स्थगित भएको केन्द्रीय कार्यालय सचिव डोरप्रसाद उपाध्यायले बताए ।उनका अनुसार बैठक भोलि बिहान ८ बजे पार्टी केन्द्रीय कार्यालय पेरिसँडाडामा बस्नेछ ।
माओवादीको केन्द्रीय कमिटीको बैठक दिउँसो १ बजे स्मार्ट दरबार ब्याङ्केट धुम्बाराहीमा हुँदैछ ।भोलि बिहान बस्ने बैठकले केन्द्रीय कमिटीको बैठकको एजेण्डा तय गर्नेछ ।
प्रचण्डले स्थायी कमिटीको बैठकमा आएको सुझावलाई समेटेर भोलिको बैठकमा ‘पार्टी रुपान्तरण र पुनर्निर्माणको संकल्प आजको आवश्यकता’ भन्ने शीर्षकमा प्रतिवेदन पेश गर्दैछन् ।
त्यसबाहेक बैठकले प्रचण्डको प्रतिवेदनमा पछिल्ला सामयिक राजनीतिक घटनाक्रम, आगामी कार्ययोजना, प्रतिपक्षमा रहेको पार्टीको भूमिकालगायतको विषय समेट्ने बताइएको छ ।
