धनुषा, २९ मंसिर । धनुषामा एक बालिका नग्न अवस्थामा मृत फेला परेकी छिन् । २४ घण्टादेखि हराइरहेकी ६ वर्षीया बालिका राखि यादवको शव सतोखर पोखरी नजिक पानी जमेको खाल्डोमा फेला परेको प्रहरीले जनाएको छ ।
उनले लगाएको कपडा भने खाल्डो छेउमा फेला परेपछि घटना शंकास्पद देखिएको छ । उनको शव बिहीबार बेलुका ७ बजे फेला परेको हो । यसबारे प्रहरीले अनुसन्धान गरी रहेको जनाएको छ।
ती बालिका विवाहपञ्चमीको अवसरमा बिहीबार निकालिएको मटकोरको रथ यात्रा सहभागी भएकी थिइन् । केही युवाहरुले उनलाई रथबाट तल उतारेका थिए । तर सबै घर फर्कदा पनि उनी नफर्किएपछि बालिकाको खोजी भएको थियो । खोजीको क्रममा बालिकाको शव खेतमा खनेको खाल्डोमा फेला परेको हो ।
बालिकालाई रथबाट उतार्ने दुुई युवालाई प्रहरीले नियन्त्रणमा लिएर सोधपुछ गरीरहेको जनाएको छ ।
