काठमाडौं, २१ असोज । इजरायलमा प्यालेस्टाइनी विद्रोही समूह हमासले आक्रमण गरेपछि इजरायलमा काम गर्न गएका नेपाली विद्यार्थीहरु नेपाल फर्किन चाहेका छन् ।
अहिले पनि विभिन्न ठाउँमा मिसाइल आक्रमण भैरहेकाले सरकारले चाँडै उद्धार गरेर स्वदेश फर्कानु पर्ने उनिहरुको माग छ । घटनास्थलबाट करीब ३० किलोमिटर पर रहेको सोरासिम नर्सरी फार्ममा काम गर्ने विद्यार्थीहरुले अहिले पनि बंकरमा नै बसिरहेको र अहिलेसम्म कसैले पनि सहयोग नगरेको बताएका छन् ।
चितवनको कृषि तथा वन विज्ञान विश्वविद्यालय, सुदूरपश्चिम विश्वविद्यालय र त्रिभुवन विश्वविद्यालयबाट कृषि, पशु विज्ञान तथा पशु चिकित्सा र वन संकायमा अध्ययन गर्ने विद्यार्थीहरु इजरायल गएका छन् । इजिप्ट नजिकैको सीमा क्षेत्रमा केही सुरक्षित जस्तो भएपनि बाँकी ठाउँमा कहाँ, कतिबेला, के हुन्छ भन्न सक्ने अवस्था नरहेको र गाजापट्टी नजिकका क्षेत्रमा रहेका फार्ममा काम गर्नेहरु बढी जोखिममा रहेको बताइएको छ ।
