काठमाडौं, २१ वैशाख । कुनैबेला आफ्ना विश्वासपात्र मानेका थिए प्रचण्डले बादल देखि टोपबहादुर रायमाझीसम्मलाई । तर, नेकपा विभाजन हुँदा दुवैले प्रचण्डलाई छाडे ।
अहिले प्रचण्ड प्रधानमन्त्री हुँदा नक्कली भुटानी शरणार्थी प्रकरणमा पूर्वउपप्रधानमन्त्री टोपबहादुर रायमाझीलाई पक्राउ गर्न लगाए ।
रायमाझी भैरहवाबाट पक्राउ गरिएको जानकारी प्रहरीले दिएको छ । रायमाझी नेकपा एमालेका सचिव तथा सांसद पनि हुन् । उनी विगतमा माओवादीमा थिए । एमाले फुट्दा रायमाझीले पुष्पकमल दाहाल प्रचण्डलाई छाडेर ओलीलाई साथ दिएका थिए । कुनैबेला प्रचण्डका विश्वासिला रायमाझीलाई प्रचण्ड नै प्रधानमन्त्री हुँदा पक्राउ गरिनुलाई अर्थपूर्ण मानिएको छ ।
बादलका छोरा प्रतिक पनि कारबाहीको दायरामा ल्याइएका छन् । रायमाझीका छोरा सन्दीप पनि पक्राउ परिकेका छन् ।
गृहसचिव भइसकेका उपराष्ट्रपति कार्यालयका सचिव टेकनारायण पाण्डे पनि शरणार्थी प्रकरणमा पक्राउ परिसकेका छन् । मङ्गलवार चर्चित सुरक्षाविज्ञ इन्द्रजीत राई यही प्रकरणमा पक्राउ परेका थिए । यो प्रकरणमा पूर्वउपप्रधानमन्त्री सुजाता कोइरालाका स्वकीय सचिव रहिसकेका केशव दुलालका अलावा अन्य चार व्यक्ति समेत पक्राउ परिसकेका छन् ।
नक्कली भुटानी शरणार्थी प्रकरणमा ४० करोडभन्दा बढी ठगी गरेकोमा प्रहरीले अनुसन्धान तिव्र पारेको छ । तर, यो फाइल खोलिनुमा प्रचण्डको बादल र रायमाझीप्रतिको असन्तुष्टिले पनि काम गरेको छ । यसलाई पूर्वमाओवादी र वर्तमान माओवादीबीचको टकरावको रुपमा पनि लिइएको छ ।
