काठमाडौँ । पहिचान पुरस्कार कोषले चार लाख राशि रहेको पहिचान पुरस्कार यस वर्ष कविता राईको उपन्यास ‘गुरु’ र अर्जुनबाबु माबोहाङ र अमित थेवे मिहाङद्धारा सङ्कलित ‘सिरिजंगा, फाल्गुनन्द र इमानसिंह चेम्जोङका लेखोट’ नामक ग्रन्थलाई संयुक्त रूपमा प्रदान गर्ने निर्णय गरेको छ । शनिबार बेलायतमा बसेको कोषको बैठकले उक्त निर्णय गरेको हो ।
‘गुरु’ उपन्यासकी लेखिका कविता राई पेसाले शिक्षक हुन् । भोजपुर, पान्धारेमा स्कूलमा अध्यापन गर्ने राईद्वारा लिखित ‘गुरु’ उपन्यास गाउँले जनजिब्रोमा जोडिएको सरल भाषा शैलीमा लेखिएको छ । विशेष गरी जनयुद्धको विषयलाई तटस्थ ढङ्गले लेखिएको छ । उपन्यासमा पूर्वी पहाडदेखि पश्चिम लमजुङको दुरा डाँडासम्मका कथा, परिवेश र पात्रहरू छन् ।
अर्को ग्रन्थका सङ्कलक तथा अनुवादक अर्जुनबाबु माबोहाङ लिम्बू जातिका संस्कार, संस्कृति र मुन्धुमका अन्वेषक तथा अध्येता हुन् । उनी तेह्रथुमको लालीगुराँस नगरपालिकाका मेयर हुन् । अमित थेवे मिहाङ कवि, पत्रकार तथा सामाजिक अभियान्त हुन् । यी दुई युवाको कृति ‘सिरिजंगा, फाल्गुनन्द र इमानसिंह चेम्जोङका लेखोट’ एउटा महत्वपूर्ण दस्तावेज हो । यो मातृभाषा र लिपिमा संरक्षण गरिएको ऐतिहासिक दस्तावेज पनि हो । धरानको विजपुरमा क–कस्ले राज्य गरे र सेनवंशीहरुको उदय कसरी भयो भन्ने विषय यस ग्रन्थमा आएको छ ।
पहिचान पुरस्कार कोषका संस्थापक संयोजक नरेश काङमाङ राईका अनुसार चैत्र ४ गते भोजपुरको चखियाडाँडामा एक समारोहको आयोजना गरी पहिचान पुरस्कार अर्पण गरिनेछ । साथै, सो अवसरमा मुन्दुम काव्य–यात्रासमेत आयोजना गरिनेछ ।
