काठमाडौं । उपप्रधान एवं गृहमन्त्री विमलेन्द्र निधीले प्रमुख प्रतिपक्षी दल नेकपा एमाले स्थानीय तहको निर्वाचन हुन नदिने पक्षमा देखिएको दाबी गर्नुभएको छ ।
माउण्टेन टेलिभिजनको वार्ता वृत्तमा कुरा गर्दै उपप्रधानमन्त्री निधीले एमालेको पछिल्लो गतिविधि हेर्दा चुनावको पक्षमा एमाले नदिखिएको उहाँको दाबी छ ।
उपप्रधानमन्त्री निधीले केही समय पहिला बसेको स्थायी समिति बैठकले संघीय चुनाव हुनुपर्ने माग राखेकाले पनि स्थानीय चुनावको पक्षमा एमाले नदेखिएको दाबी गर्नुभयो । उहाँले एमालेले बाहिर चुनावको कुरा गरे पनि भित्र भित्र चुनाव हुन नदिने खेल सुरु गरेको आरोप लगाउनुभयो ।
उपप्रधानमन्त्री निधीले सप्तरी घटनामा प्रहरीको कमजोरी देखिएको पनि बताउनुभयो । कसैको टाउकोमा त कसैको पेटमा गोली लागेको उल्लेख गर्दै निधीले यसको जवाफ खोजि भैरहेको र कसैले पनि सहि जवाफ नदिएको बताउनुभयो ।
मन्त्री निधीले मधेसी मोर्चाले राजनीतिक प्रतिशोधका आधारमा कसैलाई निषेध गर्न नहुने बताउनुभयो । उहाँले उमालेलाई राजनीतिक कार्यक्रम गर्न नदिएर मोर्चाले राम्रो नगरेको उल्लेख गर्नुभयो ।
निधीले निर्वाचनका लागि सबै पक्ष संयम हुनुपर्ने उल्लेख गर्नुभयो । उहाँले मधेसी मोर्चाको माग पुरा गर्न सरकार कटिवद्ध रहेको पनि प्रष्ट पार्नुभयो ।
