दाङ । राप्ती राजमार्ग कपुरकोट-चोरखोला सडकखण्डको स्तरोन्नतिमा ढिलासुस्ती भएको छ । ठेकेदार कम्पनीको बेवास्ताले काममा ढिलाइ भएको हो ।
२०७७ साउनमा सडक डिभिजन कार्यालय दाङले श्याम-शंकर जेभीलाई करिब १० करोड रुपैयाँमा सडक स्तरोन्नतिको जिम्मा दिएको थियो । एक वर्षमा सक्ने गरी भएको सम्झौता फेरि ६ महिना थपे पनि अहिलेसम्म करिब ६० प्रतिशत मात्र काम सकिएको छ । ढिलाइका कारण यात्रुले सास्ती भोग्दै आएका छन् । राजमार्गको स्तरोन्नतिमा लामो समयदेखि बेवास्ता भएको कपुरकोटका कमल शर्माले बताए ।
अहिले कपुरकोटदेखि चोरखोलासम्मको आठ किलोमिटर सडकमा स्तरोन्नतिको काम चलिरहेको छ । सडक स्तरोन्नतिका लागि स्थानीय प्रशासनले दैनिक आठ घन्टा यातायात बन्द गरे पनि ठेकेदार कम्पनीले खासै काम गरेको देखिएको छैन । विगतमा राजमार्गलाई चौडा बनाउन र कालोपत्रे गर्न आएको झन्डै एक करोड रकम फ्रिज हुनु सडक डिभिजन कार्यालयको लापरबाही भएको उनको भनाइ छ ।
प्रमुख जिल्ला अधिकारी लक्ष्मीदेवी हुमागाईंले राजमार्गअन्तर्गत कपुरकोट-चोरखोला सडकमा स्तरोन्नति हुन थालिएपछि दैनिक आठ घन्टा सडक बन्द भइरहेको बताइन् । सडक डिभिजन कार्यालय दाङका प्रमुख रामकुमार जैसवालले स्तरोन्नति गरिरहेको सडकखण्डमा बाह्रै महिना पहिरो खस्ने भएकाले काममा ढिलाइ भइरहेको बताए ।
करिब १० करोड रुपैयाँ बजेटबाट सडक स्तरोन्नतिको काम भइरहेको उनले जानकराी दिए । यो वर्ष कपुरकोटदेखि खारासम्मको ७६ किलोमिटर सडक मर्मतमा थप २३ करोड ३० लाख रुपैयाँ विनियोजन भएको छ ।
