बाँके । नेपाल शिक्षक महासंघ बाँकेले चौथो चरणको आन्दोलन कार्यक्रम अन्तर्गत चालू आन्दोलनबारे स्थानीय तहका राजनैतिक दलका नेतृत्वसँग अन्तरक्रिया गरेको छ ।
शनिबार नेपालगञ्ज उपमहानगरपालिका परिषर भित्रको भवनमा महासंघले राखेका शिक्षा र विद्यालय शिक्षक, कर्मचारीहरुका समस्याका माग, मुद्दा र चालू आन्दोलनबारे छलफल कार्यक्रम गरेको हो ।
कार्यक्रममा उपस्थित धेरैले शिक्षक र शिक्षा पेशाका विषयमा रहेका समस्या र समाधानका बारेमा बोलेका थिए । उनीहरुले सरकारले शिक्षा क्षेत्रको विकासका लागि कूल बजेटको २० प्रतिशत बजेट छुट्याउनु पर्ने उपस्थित राजनैतिक दलका नेतृत्वलाई अनुरोध गरेका थिए ।
कार्यक्रममा नेपालगञ्ज उपमहानगरपालिकाका मेयर डा.धवलशम्सेर राणाले महासंघको आन्दोलनप्रति आफू सकारात्मक रहेको बताए ।
महासंघका केन्द्रीय सदस्य दोर्ण वलीले महासंघ देशभरका पाँच लाख शिक्षकहरुको संगठन भएकाले संघले आफ्नो पेशामात्र नभएर शैक्षिक गुणस्तरका बारेमा पनि काम गरिरहेको बताए ।
उनले महासंघले सुरुवाती समयदेखि नै शिक्षक र शिक्षा पेशालाई मर्यादित राख्न पहल गर्दै आएको बताए । वलीले शिक्षकलाई लागि कोभिड खोप माग गर्न पनि आन्दोलन गर्नु परेको बताए ।
