कोरोना महामारीका कारण देश विकराल परिस्थितिबाट गुज्रिरहेको अवस्थामा पछिल्ला केही दिन यता प्रमुख प्रतिपक्षी दल नेपाली कांग्रेसले पार्टी कार्यकर्ताहरुलाई जनतालाई सहयोग गर्न निर्देशन दिइरहेको छ । महामारीको यस्तो अवस्थामा नेताहरु जनतालाई साथ दिन छोडेर सत्ताका लगि राजनीति गरिरहेको आरोप खेपिरहेका थिए । प्रधानमन्त्रीले संसदबाट विश्वासको मत लिने निर्णय गरेसँगै नेपाली कांग्रेसले आफ्नो नेतृत्वमा नयाँ सरकार गठन गर्ने घोषणा गरेको थियो । तर दुइ वा दुइ भन्दा बढी दल मिलेर पनि संसदबाट नयाँ सरकार बन्न नसके पछि कांग्रेस सरकारको खेलबाट पछि हट्यो ।
त्यसपछि कांग्रेसका गतिविधि नियाल्ने हो भने, कांग्रेस अहिले कोरोना विरुद्धको लडाईंमा जनताको समस्या के कस्ता छन् ? भनेर बुझ्ने प्रयास गरिरहेको देखिन्छ । यससँगै राजनीतिक वृतमा चर्चा चलेको छ, के कांग्रेस प्रतिपक्षी दलको भुमिका बलियो बनाउने अभियानमा लागेको हो ? भनेर । कांग्रेसको उद्देश्य जे भएपनि कोरोना कहरमा जनताका लागि पछिल्ला केहि दिनयता गरिरहेको काम भने सकरात्मक छ । हुन पनि यस्तो विकराल अवस्थामा सरकारलाई पर्खिएर मात्रै अवस्था ठिकठाक होला भन्न सकिन्न । जनता रोग र भोकले पिरोलिएको अवस्थामा राजनीतिक दलहरुको पनि त्यत्तिकै महत्वपुर्ण जिम्मेवारी हुन्छ । जुन कुराको बोध ढिलै भए पनि नेपाली कांग्रेसले गरेको छ ।
पछिल्ला केही दिनदेखि मुलुकमा कोरोना संक्रमितको संख्या औसतमा दैनिक नौ हजारको हाराहारीमा पुगेको छ । मृतकको सख्या बढिरहेको छ । अक्सिजन र सिलिन्डर तथा आइसियु र भेन्टिलेटरकोे अभाव भएको दर्दनाक अवस्था हामी नजिकबाट देखिरहेका छौ । यस्तो महाविपत्तीमा सरकारले गर्नुपर्ने जति काम गर्न नसकेको हुन सक्छ । यस्तोमा अन्य दलहरुले पनि जनताको लागि सक्ने जति योगदान दिन ढिलो गर्नु हुँदैन । संकटका बेला जनतालाई साथ दिन सके मात्रै दलहरुप्रति जनताको विश्वास बलियो भएर जानेछ । जनताले विश्वास गर्ने पार्टी को हो भनेर दलहरुले परिक्षा दिनु पर्ने वेला पनि हो ।
हामीहरुले पनि घरभित्र बसेर आफु र आफ्नो सामुदायलाई सुरक्षित गर्न, संकटका वेला आप्mनो टोल वासी र राज्यलाई सहयोग गर्ने दायित्व निर्वाह गर्नु पर्छ । के हामीले यो दायित्व पुरा गरिरहेका छौ त ? तपाईं हामीले पनि सोच्ने बेला भयो ।
विश्व स्वास्थ्य संगठन डब्लुएचओले गत वैशाख ३१ गते नेपाललाई तक्कालै सहयोगको आवश्यक परेको भन्दै अन्तर्राष्ट्रिय समुदायलाई सहयोग गर्न आग्रह गरिसकेको छ । यसबाट पनि हामीले यो समय कति गम्भिर हो भनेर बुझ्न जरुरी छ । यस्तो अवस्थामा सरकारलाई सत्तोसराप गरेर मात्र केही हुँदैन । प्रधानमन्त्री केपी शर्मा ओलीले पनि आलोचना गर्नेहरुलाई जवाफ दिँदै हिड्न आवश्यक छैन । प्रधानमन्त्री ओलीले सबै राजनीतिक दलसँग महामारीविरुद्ध लड्न परामर्श गरेर अघि बढ्दा उपयुक्त हुन्छ ।
सत्ता र राजनीति त चलिरहन्छ, तर यो बेला राजनीतिक दलहरूले मानवीयतामा आफूहरूलाई केन्द्रित गर्ने समय हो । कोरोना विरुद्धको यो लडाईंमा प्रमुख प्रतिपक्षी दल एक कदम अगाडी बढिसकेको छ । नेपाली कांग्रेस, माओवादी केन्द्र, जसपा, राप्रपा, माले, नेमकिपा र एमाले एकताद्ध भइ डटेर काम गर्न जरुरी छ । जसपा आफ्नो आन्तरिक विवादलाइ थाती राखेर यो अभियानमा थप सक्रिय हुनु पर्छ । सधैं जनताका मुद्दाका नाममा चर्का भाषण गर्ने माओवादीले अहिलेको अवस्थामा सर्वहारा वर्गका निम्ती ठोस कदम चालेर उदाहरण पेश गर्न सक्नुपर्छ । अरु दलहरु पनि उत्तिकै जिम्मेवारी भएको प्रमाणित गर्नु ती दलहरुको राजनीतिक जीवनको लागि हितकारी हुनसक्छ ।
सत्तारुढ पार्टीभित्रको विवाद पनि प्रधान कुरा होइन । एमालेका नेताहरु पनि कोरोनासँग लडिरहेका जनतालाई पार्टीको स्रोत साधन र पार्टी पंक्ति परिचालन गर्न ढिलो गर्नु हुँदैन । प्रधानमन्त्री ओलीले पनि अरू सबै कामलाई थाती राखेर अहिले कोरोनाविरुद्धको लडाईंमा राज्यका सबै स्रोत र साधन प्रयोग गरि जनताको जीवन रक्षामा केन्द्रित हुनै पर्छ । आफ्ना नागरिक उपचार अभावमा मरिरहेको अवस्थाबाट छिटौ नै देशलाई मुक्त गर्नुपर्छ । अहिले जनताले नियाली रहेका छन् कुन राजनीतिक दलले के गर्दैछ भनेर । भोली जनताले दलका कामहरुको हिसाव पनि राख्नेछन् ।
