काठमाडौं, २६ चैत । ‘माओवादीको भन्दा एमालेको धेरै भोट पाएर मैले चुनाव जितेको हो’ सांसद् पदबाट हट्नासाथ यस्तो प्रतिक्रिया दियो लेखराज भट्टले । उद्योग बाणिज्य तथा आपूर्तिमन्त्री लेखराज भट्टले माओवादी अध्यक्ष पुष्पकमल दाहाल प्रचण्डले जनताको भोटको मजाक उडाएको बताए ।
यो संवाददातासँग कुरा गर्दै लेखराजले भने ‘प्रचण्ड यो देशमा स्थायित्व चाहनुहुन्न । उनले जनताको मतको सम्मान गर्नुभएन । मजाक उडाउनुभयो ।’ उनको भनाई थियो– ‘त्यो क्षेत्रको कांग्रेसको मत पनि पाएको हो, क्षेत्रका जनताले जुन माया दिएका छन्, त्यो मायाको प्रतिफलमा मैले जितेको हो । जनताको मतको प्रचण्डले अपमान गर्नुभयो ।’
एमालेसँग गठवन्धन बन्ने भएपछि तत्कालीन माओवादी भित्र अन्र्तसंघर्ष चलेको जानकारी दिँदै लेखराजले भने ‘म पाँच वर्ष सरकार चल्नुपर्छ भन्ने पक्षमा सधैं थिएँ । प्रचण्ड सधैं अस्थिरताको पक्षमा थिए ।’ ‘प्रचण्डले कारवाहीको नाममा इगो साँध्नुभयो । प्रचण्डमा तानाशाही, सामन्ती र व्यक्तिवादी चिन्तन हावी छ’ उनले अगाडि भने ‘मलाई माया गर्ने जनता बीच फेरि जाने मौका प्रचण्डले दिएका छन्, त्यसका लागि प्रचण्डलाई धन्यवाद दिन्छु ।’
प्रतिनिधि सभाको बिहीबारको बैठकमा सभामुख अग्निप्रसाद सापकोटाले टोपबहादुर सहित चारजना सांसद्को सदस्यता खारेज भएको सूचना दिएको थियो । अदालतको निर्णय आउनु पहिले नै केपी शर्मा ओली अर्थात् पहिलो अध्यक्षको पक्षमा आफू लागेको भन्दै अदालतको फैसला टेक्निकल भएको लेखराजले बताए ।
उनले भने ‘मुख्य कुरा राजनीति हो । राजनीति र नैनिकता बचाउने हो, पद बचाउने हो । लेखराजले पदका लागि कहिल्यै राजनीति गरेन, प्रचण्डले जहिले पनि पदका लागि राजनीति गरे ।’
आइ. एन. ए
