ललितपुर, ६ चैत । ललितपुर महानगरपालिकाले महानगर क्षेत्रका भित्ता र पोलमा टाँसिएका पर्चाहरु हटाउन थालेको छ । स्वच्छ महानगर अभियान अन्तर्गत महानगरले भित्ता र पोलहरुमा टाँसिएका पर्चाहरु हटाई अबबाट पर्चा टाँस्न निषेध गरेको हो ।
महानगरपालिकाका मेयर चिरिबाबु महर्जनले शुक्रबार बिहान कुपन्डोलको भित्तामा टाँसिएको पम्पलेट निकालेर अभियान सुरु गरेका छन्।
अभियानको शुभारम्भसँगै नगर प्रहरीहरुले भित्ता तथा पोलहरुमा टाँसिएका पर्चाहरु निकाल्न सुरु गरेको छ । ऐतिहासिक नगरीलाई पर्चा पम्पलेटहरुले कुरुप बनाएको बताउँदै मेयर महर्जनले अबबाट यसरी टाँस्नेहरुलाई कारवाहीको दायरा ल्याइने बनाए ।
महानगरपालिकाले पहिलो चरणमा बागमती नदी देखि सातदोबाटोसम्म, पाटन ढोका, पुल्चोकबाट मंगलबजारसम्मको क्षेत्रलाई प्राथमिकतामा राखेर पर्चा पम्प्लेटहरु हटाइने बताइएको छ ।
पर्चा हटाउने आजको अभियानमा महानगरपालिका नगरप्रहरी प्रमुख सीताराम हाछेथु पनि सहभागी थिए । उनले पनि स्वच्छ महानगरपालिका अभियान अन्तर्गत नै पर्चाहरु हटाउन थालिएको बताए ।
आउने दिनहरुमा पनि होर्डिङ बोर्ड राख्ने तथा पर्चा टाँसिएमा पाँचहजार रुपैँयासम्मको जरिवाना गराइने नगरप्रहरी प्रमुख हाछेथुले जानकारी दिए ।
