सुनसरी, २८ पुस। एनआइसी एसिया बैंक धरान शाखाको एटिएम मेसिन फुटाएर चोरी गर्न खोजेको आरोपमा एक युवा पक्राउ परेका छन् ।
धरान–१२ स्थित महेन्द्र पथस्थित एनआइसी एसिया बैंकको एटिम मेसिन फुटाएर चोरी गरेको आरोपमा सुनसरीको कोशी गाउँपालिका–३ कोशीकटान जुद्धगञ्ज घर भई धरान ३ मा डेरा गरि बस्ने २३ बर्षीय सुभान मन्सुरीलाई पक्राउ गरिएको हो ।
मनसुरीलाई सोमबार साँझ करिब ५ बजे धरान १८ स्थित वीपी कोइराला स्वास्थ्य विज्ञान प्रतिष्ठानको हाता भित्रबाट पक्राउ गरिएको इलाका प्रहरी कार्यालय धरानका प्रमुख डिएसपी ज्ञानेन्द्र बस्नेतले बताउनु भयो । आइतबार साँझ ७ बजे बैंकको एटिएम मेशिन फुटाएर चोरी गर्ने प्रयास भएको थियो ।
घटनाबारे जानकारी पाएलगत्तै इलाका प्रहरी कार्यालय धरानले सिसिटिभी फुटेजको आधारमा चोरीमा संलग्नलाई पक्राउ गर्न सफल भएको इलाका प्रहरी कार्यालय धरानले जनाएको छ । पक्राउ परेका मन्सुरी यसअघि पनि गाउँमा नै चोरीमा पक्राउ परेका थिए ।
