एजेन्सी, ३० असार । इंग्लिस प्रिमियर लिग फुटबलमा आज हुने एकमात्र खेलमा चेल्सी र नर्विच सिटीबीच प्रतिस्पर्धा हुनेछ । चेल्सीको घरेलु मैदानमा हुने यो खेल नेपाली समय अनुसार राति १ बजे सुरु हुनेछ ।
रेलिगेसनमा परिसकेको नर्विचविरुद्ध मैदान उत्रदा चेल्सी सहज जितको दाउमा हुनेछ । घरेलु मैदानमा जित निकाल्दै चेल्सीले लिग तालिकाको तेस्रो स्थानमा बलियो पकड बनाउने प्रयासमा हुने छ ।
३५ खेलमा ६० अंक जोडेर चेल्सी लिग तालिकाको तेस्रो स्थानमा रहेको छ । चेल्सी चौंथो स्थानको लेष्टर सिटी र पाँचौं स्थानको म्यानचेस्टर युनाइटेड भन्दा १ अंकले अघि रहेको छ ।
नर्विचविरुद्ध चेल्सीका मध्यपक्तिका खेलाडी एनगालो कान्टे मैदान बाहिर हुनेछन् । उनी चोटको कारण नर्विचविरुद्ध खेल्ने छैनन् । नर्विच २१ अंक जोडेर पुछारमा रहेको छ ।
