इथियोपियाको राजधानी अदिस अबाबामा आयोजित पहिलो ‘अफ्रिकी सामाजिक सञ्जाल इन्फ्लुएन्सर शिखर सम्मेलन’ ले अफ्रिका महाद्वीपको वास्तविक र सकारात्मक चित्रण विश्वसामु पु¥याउन डिजिटल कूटनीतिको प्रभावकारी प्रयोग गर्नुपर्नेमा जोड दिएको छ । ’राम्रो अफ्रिकाका लागि प्रभाव’ भन्ने मूल नाराका साथ शुक्रबारदेखि सुरु भएको यस सम्मेलनमा ३० भन्दा बढी अफ्रिकी मुलुकका कन्टेन्ट क्रियटर (सामग्री निर्माता) र सञ्चार रणनीतिज्ञहरूको सहभागिता रहेको थियो । सम्मेलनलाई सम्बोधन गर्दै इथियोपियाली समाचार एजेन्सीका प्रमुख कार्यकारी अधिकृत सेइफ डेरिबेले अफ्रिकाका बारेमा फैलिएका गलत सूचना र पुराना रुढिवादी धारणाहरूलाई चिर्न सामाजिक सञ्जालका प्रभावशाली व्यक्तिहरूले नेतृत्वदायी भूमिका खेल्नुपर्ने बताउनु भयो ।
डेरिबेले सामाजिक सञ्जालका सामग्रीहरू विभाजन ल्याउने खालका नभई समुदाय निर्माण गर्ने, युवाहरूमा आशा र अवसरको सञ्चार गर्ने र अफ्रिकी सम्पदा एवं नवप्रवर्तनको प्रवद्र्धन गर्ने खालका हुनुपर्नेमा जोड दिनुभयो । उहाँले महिलाहरूको मर्यादा रक्षा र नेतृत्वको सम्मान गर्दै द्वन्द्वको सट्टा शान्ति र ध्रुवीकरणको सट्टा एकताका लागि डिजिटल माध्यमको प्रयोग गर्न सहभागीहरूलाई आग्रह गर्नुभयो । त्यसैगरी, घानाका प्रख्यात युट्युबर तथा कन्टेन्ट क्रियटर वोडे मायाले अफ्रिकीहरूले आफ्ना कथा आफैं भन्नुपर्ने धारणा व्यक्त गर्नुभयो । सम्मेलनमा प्रश्तुत गरिएको एक तथ्याङ्कअनुसार, गैर–अफ्रिकीहरूले निर्माण गरेको गलत भाष्य र भ्रमपूर्ण प्रचारका कारण अफ्रिकाले वार्षिक रूपमा करिव ४.२ अर्ब अमेरिकी डलर बराबरको आर्थिक क्षति बेहोर्नु परिरहेको छ । विश्वभरका ४० करोडभन्दा बढी दर्शकमाझ पहुँच पुर्याउने लक्ष्य राखिएको यस शिखर सम्मेलनले डिजिटल उद्यमशीलता, ज्ञान आदानप्रदान र अन्तर–अफ्रिकी साझेदारीलाई प्रवद्र्धन गर्ने उद्देश्य समेत राखेको छ ।
