एजेन्सी, १८ असार । फ्रान्समा प्रहरीको हातबाट १७ वर्षीय बालकको मृत्यु भएपछि सुरु भएको हिंसा जारी छ । फ्रान्सेली मिडियाका अनुसार प्रहरीले आइतबार ४९ जनालाई पक्राउ गरेको छ । यसअघि आइतबार ७१९ र शुक्रबार १ हजार ३ सय पक्राउ परेका थिए । फ्रान्समा हालसम्म ३ हजारभन्दा बढी व्यक्तिलाई पक्राउ गरिएको छ ।
पेरिसका प्रहरी प्रमुखले दंगा सकिएको भन्न हतार भएको बताए । आइतबार प्रहरीको गोली लागेर मारिएकी नाहेलकी हजुरआमाले जनतालाई दंगा नगर्न आग्रह गरेकी छन् । ‘दंगा रोक्नुहोस्, चीजहरू नष्ट गर्न बन्द गर्नुहोस्’–उनले भनिन् । ‘झ्यालहरू नतोड्नुहोस्, विद्यालयहरूमा आक्रमण नगर्नुहोस्। हामी चीजहरू ठीक होस् भन्ने चाहन्छौं।’ उनको अपीलपछि हिंसामा कमी आएको थियो ।
जुन २७ मा फ्रान्सको राजधानी पेरिसको उपनगरीय क्षेत्र नान्टेरेमा दुई प्रहरी अधिकारीहरूले एउटा कार रोकेका थिए। झगडाका क्रममा प्रहरी अधिकृतले गाडी चलाइरहेकी १७ वर्षीया नाहेलको टाउकोमा गोली हानेका थिए । गोली लागेर नाहेलको मृत्यु भएको थियो । त्यसपछि देशमा हिंसा भड्कियो जुन अहिले पनि जारी छ ।
फ्रान्समा दंगाका कारण पक्राउ परेका अधिकांश नाबालिग छन् । फ्रान्सका गृहमन्त्री गेराल्ड डार्मानिनले पक्राउ परेका २ हजारभन्दा बढी व्यक्तिको औसत उमेर १७ वर्ष रहेको बताए । हिंसामा ५० भन्दा बढी सुरक्षाकर्मी घाइते भएका छन् । दंगाकारीले २६ प्रहरी चौकीसहित ७४ भवनमा क्षति पुर्याएका छन् । ५ सय ७७ भन्दा बढी सवारी साधनलाई आगोको जिम्मा लगाइएको छ ।
शनिबार र आइतवारको मध्यरातमा दंगाकारीहरूले पेरिसको उपनगरमा रहेको मेयरको घरमा आक्रमण गरेका थिए । उनीहरुले मेयरको घरमा रहेको कारमा आगजनी गरेका थिए । सो क्रममा मेयरकी श्रीमती र उनका ५ र ७ वर्षका दुई छोरा घरमा उपस्थित थिए । तीनैजनाले भागेर ज्यान बचाए । सो क्रममा उनकी श्रीमती र एक छोरा घाइते भएका छन् । कारमा ठक्कर दिई मेयरको घरमा आगजनी गर्ने प्रयास भएको थियो । भाग्ने क्रममा मेयरकी श्रीमतीको खुट्टामा चोट लागेको थियो ।
फ्रान्सेली राष्ट्रपति इमानुएल म्याक्रोनले सोमबार दुवै सदनका नेताहरूसँग भेट गर्नेछन्। म्याक्रोनले मंगलबार २२० सहर र सहरका मेयरहरूलाई पनि भेट्ने छन्।
