काठमाडौं, २७ वैशाख । अर्घाखाँचीको भूमिकास्थान नगरपालिकामा आगो निभाउने क्रममा जलेर गम्भीर घाइते भएका चारै जनाको मृत्यु भएको छ । मंगलबार बिहान भूमिकास्थान नगरपालिका–२ तिरतिरे खोला गाउँका पदम वेल्वासेको घरमा सल्किएको आगो निभाउने क्रममा घाइते भएका ४ जनाको मृत्यु भएको प्रहरीले जनाएको छ ।
घाइते भएका मध्ये पीताम्बर वेल्वासे, पदम वेल्वासे र घनश्याम वेल्वासेको काठमाडौं ल्याउँदै गर्दा बाटोमा मृत्यु भएको हो भने अर्का एक घाइते माभव वेल्वासेको काठमाडौंको किर्तिपुर अस्पतालमा उपचारको क्रममा निधन भएको हो ।
उपचारको क्रममा मिसन अस्पताल पाल्पाबाट काठमाडौं ल्याइदै गर्दा तीनजनाको बाटोमै मृत्यु भएको हो । उनीहरुलाई सुरुमा जिल्ला अस्पताल सन्धिखर्कमा उपचारका लागि पुर्याइए पनि त्यहाँ उपचार सम्भव नभए पछि थप उपचारका लागि उता रेफर गरिएको थियो ।
