काठमाडौं, ९ पुस । नेपाली कांग्रेसका सभापति शेरबहादुर देउवाले देशभरका कार्यकर्ताहरुलाई एक ढिक्का भएर अघि बढ्न निर्देशन दिएका छन् ।
महासमिति बैठकमा भाग लिएर फर्किन लागेका कांग्रेस जिल्ला सभापतिहरुका लागि देउवा निवास बुढानिलकण्ठमा आयोजित चियापानमा सभापति देउवाले महासमिति बैठकले कांग्रेस एक ढिक्का भएको दाबी गरे ।
उनले कार्यकर्तालाई एक जुट भएर अघि बढ्न निर्देशन समेत दिएका छन् । देउवाले बर्तमान सरकार मनपरी ढंगले चलेको भन्दै सरकारको खवरदारी गर्न कांग्रेस कार्यकर्ताहरु लाग्नु पर्ने उल्लेख गरे ।
कार्यक्रममा कांग्रेस वरिष्ठ नेता रामचन्द्र पौडेलले महासमिति बैठकले देशभरका कार्यकर्तालाई उत्साहित बनाएको भन्दै आफू र सभापति देउवाबीच कुनै बैमनश्यता नभएको बताए । वरिष्ठ नेता पौडेलले सरकारले जनचाहना अनुसार काम गर्न नसकेको भन्दै अव कांग्रेस जनताको घर घरमा पुग्ने बताए ।
