काठमाडौं, २८ साउन । सरकारले विभिन्न ५ वटा विधेयक संघीय संसदमा पेश गरेको छ । प्रतिनिधिसभाको सोमबारको बैठकमा सरकारका तर्फबाट सम्बन्धीत मन्त्रालयका मन्त्रीले सुरक्षित मातृत्व तथा प्रजनन् स्वास्थ्य अधिकार विधेयक २०७५, नेपाल नागरिकता पहिलो संशोधन विधेयक २०७५, राहदानी विधेयक २०७५ , उपभोक्ता संरक्षण विधेयक २०७५, निवृत्तिभरण कोष विधेयक २०७५ पेश गरेका हुन् ।
उपप्रधानमन्त्री एवं स्वास्थ्य तथा जनसंख्या मन्त्री उपेन्द्र यादवले सुरक्षित मातृत्व तथा प्रजनन् स्वास्थ्य अधिकार विधेयक २०७५, गृहमन्त्री रामबहादुर थापाले नेपाल नागरिकता पहिलो संशोधन विधेयक २०७५,परराष्ट्रमन्त्री प्रदिप कुमार ज्ञवालीले राहदानी विधेयक २०७५, उद्योग वाणिज्य तथा आपूर्तिमन्त्री मात्तृका प्रसाद यादवले उपभोक्ता संरक्षण विधेयक २०७५ र अर्थमन्त्री युवराज खतिवडाले निवृित्तभरण कोष विधेयक २०७५ पेश गरेका हुन् ।
राहदानी विधेयक बाहेकका ४ विधेयक माथि परेको विरोधको सुचना वहुमतले अस्वीकृत भएपछि ती विधेयक बैठकमा पेश भएका हुन् । ४ वटै विधेयकमा सांसद प्रेम सुवालले विरोधको सूचना दर्ता गराएका छन् ।
त्यसैगरी सार्वजनिक सुरक्षा तेश्रो संशोधन विधेयक पनि संघीय संसदमा पेश भएको छ । संसदीय समितिले विधेयकमाथि आवश्यक छलफल गरि सुझाव सहितको प्रतिवेदन बैठकमा पेश गरेको हो ।
राज्य व्यवस्था तथा सुशासन समितिका तर्फबाट जेष्ठ सदस्य दिलेन्द्र प्रसाद बडूले सार्वजनिक सुरक्षा तेश्रो संशोधन विधेयक सम्बन्धी समितिको प्रतिवेदन पेश गरे । त्यसैगरी बैठकमा अन्तर्राष्ट्रिय हवाई परिवहन विषयक नियमहरु एकीकरण गर्ने सम्बन्धमा व्यवस्था भएको महासन्धि पनि पेश भएको छ ।
