काठमाडौं, १ साउन । विश्वकप फुटबलको उपाधि जितेर स्वदेश फर्किएको फ्रान्सेली टिमलाई भव्य स्वागत गरिएको छ ।
दोस्रो पटक विश्वकपको ट्रफीसहित विमानस्थलबाट वाहिर निस्कंदा घरेलु समर्थकहरुले फ्रान्सेली टोलीलाई भव्य स्वागत गरेका हुन् । फ्रान्सेली टोलीलाई रसियाबाट घर फर्किदा ५ लाखभन्दा बढी समर्थकले सडकमा ओर्लिएर स्वागत गरेको अन्तर्राष्ट्रिय सञ्चारमाध्यमहरुले जनाएका छन् । विमानस्थलदेखि पेरिससम्मको सडक समर्थकको भीडले भरिएको थियो ।
खेलाडीलाई विमानस्थलबाट फ्रेन्च भाषामा च्याम्पियन्स खेलेर तयार पारिएको विशेष बसमा पेरिस लगिएको थियो । खेलाडी जाने बाटोका लेन पुरै खाली गरिएको थियो भने एक लेन समर्थकले भरिएको थियो । सडकमा उपस्थित समर्थकले राष्ट्रिय झण्डा फहराएर टोलीको स्वागत गरेका थिए । नगर परिक्रमापछि खेलाडीलाई राष्ट्रपति भवनमा तीन हजारभन्दा बढी पाहुनाको उपस्थितिमा विशेष सम्मान गरिएको अन्तर्राष्ट्रिय सञ्चारमाध्यमहरुले जनाएका छन् । फ्रान्सले गत आइतबार क्रोएसियालाई ४–२ गोलअन्तरले पराजित गरी दोस्रोपटक विश्वकपको उपाधि जितेको थियो ।
