काठमाडौँ, १० असार । कुवेतमा अपराध गर्ने विदेशीको सूचीमा नेपाली समुदाय ‘अन्य’ मा पर्छ । कुवेतको आन्तरिक मन्त्रालयको प्रतिवेदनअनुसार सन् २०१७ मा १० हजार ९ सय २९ वटा अपराधजन्य घटना भएका थिए ।
जसमा सबभन्दा बढी इजिप्सियन (२ हजार ६ सय २१), दोस्रोमा बेडोइन क्षेत्रका (१८ सय ३), तेस्रोमा भारतीय (११ सय ३१), चौथोमा सिरियन (एक हजार ६) र पाँचौंमा साउदी (८ सय ६) नागरिक अपराध घटनामा संलग्न छन् ।
त्यसपछि क्रमश बंगलादेशी (५०२), श्रीलंकाली (१९३), फिलिपिनो (३४३), जोर्डनी (२३२), पाकिस्तानी (२९६), इरानी (२३४), लेबनानी (२३३) र इराकी (१६५) नागरिक अपराधमा लागेको देखिन्छ ।
यसरी ‘इमानदार’ को छवि बोकेका नेपाली कामदारलाई पछिल्लो समय एउटा दाग लागेको छ, ‘यिनीहरू रक्सी बनाउने र बेच्ने गर्छन् ।’ अपार्टमेन्ट भाडामा लिएर बसेका एक नेपालीले दिएको जानकारीअनुसार कोठाकोठामा जाँडरक्सी उत्पादन हुन्छ । ‘थौरै परिमाणमा कोठामै बन्छ, ठूलो परिमाणमा भने सिंगो भिल्ला लिएर उत्पादन हुन्छ,’ उनले भने । कुवेतको हसाबिया, फर्बानिया, महाबुल्ला, माङगाफ, हवाली, जिलिवलगायत क्षेत्रमा नेपालीसहित आप्रवासीको उल्लेख बसोबास छ । हसाबियालाई सबैभन्दा बढी गैरकानुनी काम हुने क्षेत्र मानिन्छ । गत साता मात्रै कुवेत प्रहरीले साद अल–अब्दुल्लाह क्षेत्रमा नेपालीको मदिरा भट्टी फेला पारेको थियो । त्यसमा तीन महिलासहित ६ नेपाली पक्राउ परे भने २ सय ५० ब्यारेल मदिरा बरामद भयो ।
झन्डै डेढ लिटरसम्म रक्सीको प्रतिबोतल १० केडी अर्थात् तीन हजार ५ सय रुपैयाँमा बिक्री हुन्छ । विदेशी रक्सी ४५ केडीसम्ममा बिक्री हुन्छ । न्यून आम्दानी भएका कामदार यस्तो कार्यमा बढी संलग्न छन् । घरेलु कामदारका रूपमा आएका महिलालाई यसमा बढी प्रयोग गर्ने गरिएको छ । काम गर्ने घरमा दुख पाएका महिलालाई भगाएर कोठामा राख्ने गिरोह नै छ । आजको कान्तिपुरमा खवर छ ।
