भारतीय पक्षले चलाएको गोली लागि गोविन्द गौतमको मृत्यु भएको एक वर्ष पुरा
पुष्कर भट्ट
कञ्चनपुर, २६ फागुन । कञ्चनपुरको पुर्नवासमा सीमा विवादको विषयलाई लिएर भारतीय पक्षले चलाएको गोली लागि गोविन्द गौतमको मृत्यु भएको एक वर्ष बितेको छ । सीमाको रक्षार्थ लडेका गौतमलाई नेपाल सरकारले सहिद घोषणा गर्यो । तर गोविन्दको परिवार भने अझै कष्टकर जीवन बिताउन बाध्य छन् ।
कञ्चनपुरको पुर्नवास नगरपालिका–४ आनन्द बजारमा गत वर्ष भारतीय सुरक्षाकर्मीले चलाएको गोली लागि ३२ बर्षिय गोविन्द गौतमको मृत्यु भएको थियो । कञ्चनपुरको गोविन्द बजार र भारत लखिमपुरखिरीको बसही बजार जोड्ने नालामा कल्भर्ट निर्माणको विषयलाई लिएर भारतीय पक्षले अवरोध गरेपछि त्यसको बिरुद्धमा गोविन्द उत्रिएका थिए ।
सोही क्रममा भारतीय सुरक्षाकर्मीले गोली चलाउँदा उनको मृत्यु भएको थियो । आन्दोलनले उग्र रुप लिएपछि मात्रै नेपाल सरकारले गोविन्दलाई सहिद घोषणा गरेको थियो । तर गोविन्दको परिवारमा अझै खुसी छाउन सकेको छैन ।
सहिद गोविन्दका ७२ बर्षिय बुबा खेमलाल गौतम, ६७ बर्षिय आमा हरिदेवी गौतम र तीन छोरी सहित श्रीमती लक्ष्मी गौतम अध्याँरोमा जीवन विताउन बाध्य छन् । सरकारले सहिदको सम्झनामा गोबिन्दको सालिक बनाउने, परिवारलाई रोजगारी दिने सहमति गरेको थियो । तर सहमति कार्यान्वन नभएको परिवारको गुनासो छ ।
नेपाली र भारतीय बजार जोड्ने नालामा कल्भर्ट निर्माणको विषयलाई लिएर गोविन्दको मृत्यु भएपछि दुबै देशको बजार सुनसान छ । एकबर्षसम्म पनि बजार संचालन हुन सेकेको छैन । नेपाल भारत सीमाको विषलााई लिएर पटक-पटक आन्दोलन हुने गरेको छ ।
तर दुई देशको उच्च तहमा सीमा विवाद समाधानको लागि पहल भएको छैन । नेपाली भूमि भारतले मिचि रहँदा पनि नेपाल सरकार मौन बस्ने गरेको सीमा क्षेत्रका स्थानीयको भनाई छ । दुई देशबीचको सीमा विवाद समाधान गरेर भारतीय हस्तक्षेप रोक्ने हो भने मात्र सहिद गोविन्द गौतमप्रति सच्चा सम्मान हुने स्थानीयको भनाई छ ।
