त्रिपुरामा कम्युनिष्ट शासन अन्त्य हुने संकेत, भाजपा अगाडि
एजेन्सी, १९ फागुन । भारतका पूर्वोत्तर तीन राज्य त्रिपुरा, मेघालय र नगाल्याण्डमा विधानसभा चुनावको मतगणना भइरहेको छ ।
त्रिपुरामा १८ फेब्रुअरी तथा मेघालय र नगाल्याण्डमा २७ फेब्रुअरीमा मतदान भएको थियो । तीनै राज्यमा आज मतगणना भइरहेको हो । मतगणना भइरहेकामध्ये धेरैको ध्यान त्रिपुरा राज्यमा छ ।
२५ वर्षदेखि कम्युनिष्ट शासनमा रहेको त्रिपुरामा यसपटक भारतीय जनता पार्टी अगाडि देखिएको छ । ६० सिट रहेको विधानसभामा भाजपाले ३० सिटमा अग्रता लिएको छ भने कम्युनिष्ट पार्टीले १९ सिटमा अगाडि छ ।
त्रिपुरामा ५९ सिटका लागि मतदान भएको हो । चारीमाल विधानसभा सिटका प्रत्यासी रामेन्द्र नारायणको निधन भएकाले निर्वाचन रोकिएको छ ।
त्यहाँ मार्च १२ मा मतदान हुनेछ । सन् १९९३ देखि सत्तामा रहँदै आएको माक्र्सवादी कम्युनिष्ट पार्टी नेतृत्वको वाम गठबन्धनको सरकार रहे पनि यसपटक क्रम तोडिने देखिएको छ ।
