काठमाडाैं । निर्वाचनलाई लक्षित गर्दै आज काठमाडौं उपत्यकाका सडकमा सवारीसाधन आवागमनमा निकै कडाइ गरिएको छ । मतदानको दिन अनुमतिपत्र (पास) नलिएका सवारीसाधन चलाउन रोक लगाइएपछि उपत्यकाका मुख्य सडकहरू सुनसान देखिएका छन् भने चोक–चोकमा ट्राफिक प्रहरीले कडा सुरक्षा जाँच गरिरहेका छन् ।
सडकमा गुड्ने सवारीसाधनलाई नियन्त्रण र अनुगमन गर्न प्रहरीले ‘हिलटेक’ लेखिएका ट्राफिक कोन र पहेँलो–रातो रंगका फोल्डिङ ब्यारिकेडहरू सडकको बीचमा राखेर विभिन्न ठाउँमा चेकप्वाइन्टहरू निर्माण गरेको छ । जसका कारण अन्य दिनहरूमा निकै व्यस्त रहने उपत्यकाका सडकहरू आज प्रायः खाली र सुनसान छन् । ट्राफिक प्रहरीले सडकमा गुडेका प्रत्येक सवारीसाधनलाई रोकेर सोधपुछ तथा पासको जाँच गरिरहेका छन् । अत्यावश्यक सेवाअन्तर्गतका गाडीहरूलाई समेत परिचयपत्र र प्रयोजन हेरेर मात्र अगाडि बढ्न दिइएको छ । विशेषगरी मोटरसाइकल र स्कुटर जस्ता दुईपाङ्ग्रे सवारीसाधनमाथि प्रहरीले कडा निगरानी राखेको छ ।
तस्बिर : अनुप प्रधान
