२०८१,११,२
सत्तारूढ दलहरू नेपाली कांग्रेस र नेकपा एमालेले आफ्ना सांसदहरूलाई बुधबारको संसद् बैठकमा अनिवार्य उपस्थित हुन ह्वीप जारी गरेका छन्। उक्त दिन अध्यादेशहरू स्वीकृतिका लागि प्रस्तुत हुने भएकाले दुवै दलले सांसदहरूलाई अनिवार्य उपस्थितिका लागि ह्वीप जारी गरेका हुन्। सरकारले जारी गरेका ६ अध्यादेशमध्ये भूमिसम्बन्धी अध्यादेशबाहेक अन्य पाँच अध्यादेश अघि बढाउने तयारीमा सत्तारूढ दलहरू छन्। भूमिसम्बन्धी अध्यादेशमा भने विपक्षी दलले मात्र नभई सत्ता साझेदार लोसपा र सरकार समर्थित दल जसपा नेपालले साथ नदिएपछि सरकार पछि हटेको छ।
जसपा फकाउने अनेकन् प्रयास विफल भएपछि सरकारले अन्य पाँच अध्यादेश मात्र अघि बढाउन लागेको हो। भूमि अध्यादेश भने फिर्ता लिएलगत्तै विधेयक सदनमा लाने तयारीमा सरकार छ।
