ढोरपाटन दुर्घटनाः ३ जना घाइतेलाई पोखरा पठाइयो

बागलुङ, २८ पुस ||
बागलुङको ढोरपाटनमा भएको जीप दुर्घटनामा गम्भीर घाइते भएका तीनजनालाई थप उपचारका लागि हेलिकप्टरमार्फत पोखरा पठाइएको छ। बुर्तिबाङ बजारबाट ढोरपाटनतर्फ जाँदै गरेको जीप ढोरपाटन नगरपालिका–५ अस्तुमा दुर्घटना हुँदा दुईजनाको घटनास्थलमै मृत्यु भएको थियो भने नौजना घाइते भएका थिए। घाइते लक्ष्मी गैरे, जोगनारायण गैरे र निरुता गैरेलाई थप उपचारका लागि पोखरास्थित मणिपाल शिक्षण अस्पताल पठाइएको जिल्ला प्रहरी कार्यालय बागलुङले जनाएको छ । अन्य ६ जना घाइतेको बुर्तिबाङ प्राथमिक स्वास्थ्य केन्द्रमा उपचार भइरहेको छ। दुर्घटनामा जीप चालक ढोरपाटन नगरपालिका ४ का ३० वर्षीय तिलक घर्तीमगर र चन्द्रागिरि नगरपालिका ११ काठमाडौँकी २८ वर्षीया सङ्गीता अधिकारीको घटनास्थलमै मृत्यु भएको थियो।
जीपको ब्रेक फेल भएर दुर्घटना भएको प्रहरीको प्रारम्भिक अनुमान छ।