काठमाडौं,४ पुस । काठमाडौंको तिनकुनेस्थित हिमालयन ह्वाइटहाउस इन्टनेसनल कलेजका विद्यार्थीहरुले प्रदर्शनमा उत्रेका छन् । कक्षा १२ मा पढ्ने छात्रालाई कलेजका अनुशासन प्रमुख (डीआई) कृष्ण प्रसाद नेपालले यौन दुर्व्यवहार गरेको भन्दै विद्यार्थीहरुले प्रदर्शनमा उत्रिएको एक विद्यार्थीले बताए ।
उनले सोमबार छात्रामाथि दुर्व्यवहार गरेपछि विद्यार्थीहरुले प्रधानाध्यापक समक्ष कुरा गरेको बताए । विद्यार्थीहरुमाथि प्रधानध्यापकले कक्षाकोठाभित्र थुनेर कुटपिट गरेको उनीहरुले आरोप लगाएका छन् । विद्यार्थीहरुको अनुसार प्रहरीमा खबर गर्दा उल्टै प्रहरीले कलेज प्रशासनसँग मिलेर विद्यार्थीहरुमाथि कुटपिट गरेको थियो ।
विद्यार्थीहरुले प्रहरीमा उजुरी गर्न जानु अघि नै कलेज प्रशासनले विद्यार्थीहरुले कलेजमा तोडफोड गरेको भन्दै प्रहरी बोलाएर विद्यार्थीमाथि नै कुटपिट गरेको उनीहरुको गुनासो छ । आज अभिभावकहरुसहित विद्यार्थीहरुले डीआईलाई कारबाही गर्न माग गर्दै प्रदर्शन गरेका छन् ।
