काठमाडौं । अन्तर्राष्ट्रिय क्रिकेट परिषद्(आईसीसी) ले अबदेखि पुरुष र महिला क्रिकेट प्रतियोगितामा समान पुरस्कार दिने घोषणा गरेको छ ।
यो घोषणासँगै आईसीसीले गर्ने पुरुष र महिला क्रिकेट प्रतियोगितामा समान राशिको पुरस्कार दिइने छ । दक्षिण अफ्रिकाको डर्बनमा भएको वार्षिक सम्मेलनमा आईसीसीले आफ्ना सबै महिला र पुरुष टोलीको पुरस्कार रकम समान बनाउने घोषणा गरेको हो ।
यस निर्णियपछि अब महिला र पुरुषको उस्तै किसिमको प्रतियोगिता विजेता लगायतले पाउने पुरस्कार रकम पनि बराबर हुनेछ । आईसीसी अध्यक्ष ग्रेग बार्कलेले यो महत्वपूर्ण क्षण भएको बताएका छन् ।
यो क्रिकेट खेलको इतिहासमा महत्वपूर्ण क्षण भएको भन्दै उनले आईसीसीको विश्वव्यापी प्रतियोगितामा प्रतिस्पर्धा गर्ने पुरुष र महिला क्रिकेटरले समान पुरस्कार राशि पाउने प्रष्ट पारे । पुरस्कार राशी समान बनाउने प्रयास स्वरुप २०१७ देखि महिला प्रतियोगितामा पुरस्कार बढाउँदै आएको अध्यक्ष बार्कले बताए ।
