काठमाडौं । प्रतिनिधि सभा सदस्य भानुभक्त जोशीले शिक्षकहरुको उचित व्यवस्थापन गर्न सरकारको ध्यानाकर्षण गराउनुभएको छ ।
बुधवार प्रतिनिधि सभा बैठकमा बोल्दै प्रतिनिधि सभा सदस्य जोशीले २०४९ सालदेखि अहिलेसम्म काम गरिरहेका माध्यामिक तह(तत्कालिन उच्चमावि) का शिक्षकहरुको बारेमा सरकारले केही पनि व्यवस्था नगरेको भन्दै उनीहरुको उचित व्यवस्थापन गर्न माग गर्नुभयो । उहाँले शिक्षकहरु आन्दोलित भएकाले उनीहरुको मागको सम्बोधन गर्न अनुरोध गर्नुभयो ।
प्रतिनिधि सभा सदस्य महेशकुमार बर्तौलाले देशका विभिन्न स्थानीय तहका स्वास्थ्यकर्मीहरुले महिनौँदेखि तलव पाउन नसकेका भन्दै उनीहरुलाई तलवको सुनिश्चितता गर्न माग गर्नुभयो ।
प्रतिनिधि सभा सदस्य माधव सापकोटाले बेपत्ता पारिएका व्यक्तिको छानविन, सत्य निरुपण तथा मेलमिलाप आयोग सम्बन्धी विधेयक संसदको यहि अधिवेशनबाट पारित गर्नुपर्ने बताउनु भयो । त्यस्तै संघीय निजामती कर्मचारी सेवा ऐन, संघीय शिक्षा ऐन, संघीय प्रहरी समायोजन ऐन जस्ता महत्वपूर्ण ऐनहरुलाई पनि यसै अधिवेशनमा पारित गर्न सरकारको ध्यानाकर्षण गराउनु भयो ।
प्रतिनिधि सभा सदस्य मेनकाकुमारी पोखरेलले किसानहरुले मल पाउन नसकेको भन्दै सरकारको ध्यानाकर्षण गराउनु भयो । उहाँले बिचौलिया र सहकारीहरुले किसानलाई मल नदिने गरेको भन्दै उनीहरुलाई कारबाही गर्न सरकारसँग माग गर्नुभयो ।
प्रतिनिधि सभा सदस्य मंगलप्रसाद गुप्ताले संघीय निजामती सेवा ऐन तत्काल ल्याएर लागू गर्न माग गर्नुभयो ।
प्रतिनिधि सभा सदस्य रघुजी पन्तले विद्युतको अनियमितता हुन थालेको भन्दै सरकारको ध्यानाकर्षण गराउनु भयो ।
प्रतिनिधि सभा सदस्य रणकुमारी बलम्पाकी मगरले अनलाइनमार्फत घर–घरमा पासपोर्ट पु¥याउने व्यवस्था गर्न माग गर्नुभयो ।
प्रतिनिधि सभा सदस्य रणेन्द्र बरालीले गायक प्रकाश सपुतमाथि रोमनियामा बोतल प्रहार गर्नेलाई हदैसम्मको कारबाही गर्न माग गर्नुभयो ।
प्रतिनिधि सभा सदस्य रमा कोईराला पौडेलले जुम्ला हिमा गाउँपालिकाका मायालाल परियारको मलेसियामा निधन भएको भन्दै उहाँको बीमा लगायतको सुविधासहित पार्थिव शरिर नेपाल ल्याउन सरकारको ध्यानाकर्षण गराउनु भयो ।
प्रतिनिधि सभा सदस्य रञ्जुकुमारी झाले मनशुनबाट हुने क्षतिबाट बच्न पूर्वतयारीमा रहन सरकारको ध्यानाकर्षण गराउनुभयो ।
प्रतिनिधि सभा सदस्य राजेन्द्रकुमार केसीले ललिता निवास जग्गा प्रकरणमा संलग्न ठूलाहरुलाई समात्न प्रधानमन्त्रीको ध्यानाकर्षण गराउनु भयो ।
प्रतिनिधि सभा सदस्य रामकुमार राईले भूकम्प पीडितले दोस्रो र तेस्रो किस्ता नपाउँदा नपाएको भन्दै दुवै किस्ता दिन सरकारको ध्यानाकर्षण गराउनु भयो ।
प्रतिनिधि सभा सदस्य रामप्रकाश चौधरीले अतिरिक्त हुलाकका ११ हजार कर्मचारीलाई रोजगारीबाट मुक्त गरिएको भन्दै उनीहरुलाई सोही पदमा कायम राख्न माग गर्नुभयो ।
प्रतिनिधि सभा सदस्य रामहरी खतिवडाले ललिता निवास जग्गा प्रकरणका आरोपित सबैलाई पक्रन सरकारसँग माग गर्नुभयो ।
प्रतिनिधि सभा सदस्य रोशन कार्कीले दाइजो पीडितहरुको उजुरी हेर्न र दोषि उपर कारबाही गर्न गृह मन्त्रालयमा हेल्पलाइन डेस्क राख्न माग गर्नुभयो । उहाँले उजुरीहरु माथि फास्टट्रयाकबाट कारबाही गर्नुपर्ने बताउनु भयो ।
प्रतिनिधि सभा सदस्य लिलानाथ श्रेष्ठले कृषकहरुलाई मलखादको अभाव भएको भन्दै यसतर्फ सरकारको ध्यानाकर्षण गराउनु भयो । उहाँले वर्षायाम्मा तराईमा बाढी आउनेतर्फ सचेत हुँदै सुरक्षाका लागि चाहिने सामग्रीहरुको व्यवस्था गर्न सरकारसँग माग गर्नुभयो ।
प्रतिनिधि सभा सदस्य लेखनाथ दाहालले सरकारले जग्गाको कित्ताकाट रोकिएको अवधिमा भूमाफिया र जग्गा दलालमार्फत् जग्गाको कित्ताकाट भएको भन्दै सो उपर छानविन गरी दोषिउपर कारबाही गर्न माग गर्नुभयो ।
उहाँले भू–उपयोग निति बने नबनेको सम्बन्धमा पनि सरकारको जवाफ माग गर्नुभयो ।
