काठमाडौं । पहिलो एकदिवसीय अभ्यास खेलमा नेपाल स्कटल्याण्डसँग पराजित भएको छ ।
दक्षिण अफ्रिकामा बिहीबार भएको अभ्यास खेलमा नेपाल स्कटल्याण्डसँग ७ विकेटले पराजित भएको हो ।
नेपालले दिएको १ सय ३६ रनको लक्ष्य स्कटल्याण्डले ३ विकेट गुमाएर २९ ओभरमा १ सय ३७ रन जोड्दै पूरा गर्यो ।
त्यसअघि टस हारेर पहिला ब्याटिङ गरेको नेपालले २८ ओभर ५ बलमा अल आउट हुँदै मात्र १ सय ३५ रन बनाएको थियो ।
नेपालका लागि कुशल मल्लले सर्वाधिक ३७ रनको योगदान गरे ।
उनले २६ बलमा ४ चौका र २ छक्का प्रहार गरे । त्यस्तै ओपनर आसिफ शेखले २८ रन बनाउँदा कुशल भुर्तेल १६ रन बनाए ।
नेपालका लागि दीपेन्द्र सिंह ऐरीले १३ रन बनाउँदा अन्य ब्याट्म्यानले दोहोरो अंकमा रन जोड्न सकेनन् ।
स्कटल्याण्डका ब्रेन्डन म्याकुमलन र ज्याक जार्विसले तीन–तीन विकेट लिए । त्यस्तै शफ्यान शरिफले दुई विकेट लिँदा निल र हम्जा ताहिरले समान एक विकेट लिए ।
नेपाली टोलीले दोस्रो अभ्यास खेल शनिबार नेदरल्यान्ड्ससँग खेल्नेछ ।
