काठमाडौं । नेपाली काँग्रेसका सांसद रामहरी खतिवडाले सभामुखको नियतमाथि नै प्रश्न उठाउनु भएको छ ।
शुक्रवार नयाँ बानेश्वरस्थित संघीय संसद भवनमा सञ्चारकर्मीहरुसँग कुराकानी गर्दै उहाँले संसद नचलाउने नियत देखिएको बताउनु भएको हो ।
सभामुखले प्रतिनिधि सभा बैठकमा मन्त्रीलाई जवाफ दिन रुलिङ गरेको भए संसद बैठक चल्ने धारणा राख्नुभयो । उहाँले भन्नुभयो – ‘सभामुखले शुरुमै रुलिङ गरिदिएर कुनै मन्त्रीलाई यो भएको के हो यस्तो कुराहरु आयो यसको जवाफ दिन म अनुरोध गर्छु भनेको भए सदन शुरुमै चल्थ्यो । सदन नचलाउने नियत देखियो कसको हो थाहा छैन ? किन नियत देखियो थाहा छैन ।’
उहाँले भूटानी शरणार्थी मुद्दालाई विषयान्तर गर्न अन्य विषयलाई संसदमा ल्याउनु जरुरी नभएको बताउनु भयो । ‘भुटानी शरणार्थी मुद्दालाई डाइभर्ट गर्न फेरि अन्य इस्युहरुलाई ल्याउनुपर्ने जरुरी छैन,’ उहाँले भन्नुभयो ।
