काठमाडौं । बारा, चितवन र तनहुँमा वैशाख १० गते हुने उपनिर्वाचनका लागि चैत्र २४ गतेबाट आचारसंहिता लागू हुने भएको छ ।
निर्वाचन आयुक्त रामप्रसाद भण्डारीले निर्वाचन आयोग र निर्वाचन आचारसंहीता केन्द्रिय अनुगमन समितिको बैठक बसेर चैत्र २४ गतेबाट सम्बन्धित सबै पक्षहरुमा लागू हुनेगरी उपनिर्वाचन प्रयोजनार्थ आचारसंहीता लागू हुने जानकारी दिनुभयो ।
उहाँले आचारसंहिता उल्लंघन भए उल्लंघनकर्तालाई सजायको भागिदार गराउन आयोगले कुनै कसुर बाँकी नराख्ने प्रष्ट पार्नुभयो । उपनिर्वाचन हुने बारा, चितवन र तनहुँ जिल्लाभर नै शुक्रवारबाट आचारसंहीता लागू हुने आयुक्त भण्डारीको भनाइ थियो । कतिपय आचारसंहीताको विषयवस्तु, संघीय सरकार, प्रदेश र स्थानीय तह लगायत सबैलाई लागू हुनेपनि उहाँले जानकारी दिनुभयो ।
निर्वाचन आयुक्त भण्डारीले निर्वाचन आचारसंहीता कडाईकासाथ कार्यान्वयन गर्न सम्बन्धित पक्षहरुलाई निर्देशन दिइसकेको बताउनु भयो । उहाँले विगतका निर्वाचनको अनुभव रहेकाले उपनिर्वाचनमा राम्रोसँग आचारसंहीता कार्यान्वयन गराउने पक्षमा आयोग रहेको स्पष्ट पार्नुभयो ।
