काठमाडौं, १६ फागुन । नारायणहिटी सङ्ग्रहालय खुलेको १५ वर्ष अवधिमा लाखौंले सङ्ग्रहालय अवलोकन गरेका छन् । विगत १५ वर्षमा ४५ लाख बढीले संग्रहालय अवलोकन गरेका हुन् ।
पछिल्लो तीन वर्षमा करिब १० लाखले अवलोकन गरेका छन् ।आजदेखि नारायणहिटी सङ्ग्रहालय तथा नारायणहिटी दरबार सङ्ग्रहालय गणतन्त्र स्मारक व्यवस्थापन तथा सञ्चालन विकास समितिले ई–टिकेटिङ सेवा शुरू गर्ने भएको छ । सङ्ग्रहालय स्थापना भएको १४ वर्ष पूरा गरी १५ वर्षमा पुगेको अवसरमा ई–टिकेटिङ सेवा शुरू गर्न लागेको हो ।
व्यवस्थित रूपमा टिकटका बिक्रीवितरण गर्न र अवलोकनकर्ताको सहजताका लागि सो व्यवस्था गरेको समितिले जनाएको छ । ई–टिकेटिङ सेवाको शुभारम्भ संस्कृति, पर्यटन तथा नागरिक उड्डयन मन्त्रालयका सचिव सुरेश अधिकारीले गर्ने कार्यक्रम रहेको छ ।
