काठमाडौं । आइसिसी विश्वकप लिग–२ त्रिकोणात्मक ओडिआई सिरिजमा नेपालले पपुवा न्युगिनीमाथि जित निकालेको छ ।
यूएईमा आजबाट सुरु भएको सिरिजमा नेपालले पीएनजीलाई ४ विकेटले पराजित गर्दै जित निकाल्न सफल भएको हो ।
पीएनजीले दिएको २ सय ४ रनको लक्ष्य नेपालले ४५.२ ओभरमा ६ विकेटको नोक्शानीमा भेटाएको हो ।
नेपालका लागि ओपनर कुशल भुर्तेलले ६९ बलमा ५६ रनको अर्धशतकीय ईनिङ खेले । अर्का ओपनर आसिफ शेखले ४४ रनको योगदान दिए । आरिफ शेखले ३८ रन बनाए भने कप्तान रोहितकुमार पौडेलले २० रन बनाए ।
पीएनजीका लागि कप्तान असद भालाले ३ तथा नर्मन भानुवा र सेसे बाउले समान १÷१ विकेट लिए ।
त्यसअघि पहिले ब्याटिङ गरेको पीएनजीले ५० ओभरमा ९ विकेट गुमाएर २ सय ३ रन बनाएको हो ।
पीएनजीका लागि चाड सोपारले अविजित ३६ रन बनाउँदा कप्तान असद भाला ३६ रनमा आउट भए ।
