समाचार

फागुन २५ आइतबार ।
नेपाली कांग्रेसले आजदेखि ‘मिसन रोजगारी अभियान सुरु गर्ने भएको छ ।एक वर्षसम्म सञ्चालन हुने अभियानको आज दिउँसो १ बजे पार्टी केन्द्रीय कार्यालय सानेपामा औपचारिक शुरू हुने कांग्रेस केन्द्रीय कार्यालयले जनाएको छ ।

दुई महामन्त्री गगन थापा र विश्वप्रकाश शर्माले ‘राजनीतिक विमर्शको केन्द्रमा रोजगार(सरकारको प्राथमिकतामा रोजगार’ भन्ने लक्ष्यका साथ ‘मिसन रोजगारी’ अभियान सञ्चालन सुरु गर्न लागेका हुन् । राजनीतिक विमर्शको केन्द्रमा रोजगार, सरकारको प्राथमिकतामा रोजगार’ भन्ने लक्ष्यका साथ सञ्चालन हुने अभियानअन्तर्गत आज ‘अब रोजगारका कुरा गरौं’ विषयमा गोलमेच छलफल हुनेछ ।

फागुन २४ शनिबार ।
राष्ट्रिय प्रजातन्त्र पार्टी राप्रपाका अध्यक्ष राजेन्द्र लिङदेनले राजा भोटको राजनीतिभन्दा माथि रहने संस्था भएको बताएका छन् । शनिबार वीरगन्जको लालबगलामा आयोजित कार्यक्रममा उनले यस्तो बताएका हुन् ।प्रजातन्त्र दिवसका अवसरमा पूर्वराजा ज्ञानेन्द्र शाहले राजनीतिक दलहरूले देश बर्बाद बनाएको र अब मुलुकमा राजसंस्था आवश्यक भएको सन्देश दिएको उनले जिकिर गरे ।

उक्त सन्देशपछि प्रधानमन्त्री केपी शर्मा ओली, नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’, नेपाली कांग्रेसका सभापति शेरबहादुर देउवालगायत नेताहरूले पूर्वराजा शाहलाई पार्टी खोलेर निर्वाचनबाट विजयी भएर आउन चुनौती दिँदै आएका छन् । सोही अभिव्यक्तिप्रति लक्षित गर्दै अध्यक्ष लिङदेनले राजा भोटको राजनीतिभन्दा धेरैमाथिको संस्था भएको बताएका हुन् ।

बर्तमानका नेतासँग आफूहरू नै चुनाव लड्न पर्याप्त रहेको उनले उल्लेख गरे । आफूहरूले राजनीतिक दलको नभई देशको राजा स्थापित गर्न खोजेको उनले बताए ।प्रत्यक्ष निर्वाचित कार्यकारी, प्रदेश खारेज आफ्नो पार्टीका माग रहेको उनले सुनाए ।

कार्यक्रममा राजेन्द्र लिङदेन भने–
राजाले पहाडमा नभएर मधेसको जनताले रोजगारी पाओस्, मधेसको जनताले गरिखाने वातावरण निर्माण होस् भनेर खोलेको उद्योगधन्दाहरू बेचेर खाए । कृषि औजार कारखाना, चिनी कारखाना, जनकपुर चुरोट कारखाना बन्द गरे र आज दर्जनौँ भ्रष्टाचारकाण्डहरूमा उनीहरूको नाम मुछिएको छ । त्यस्ता नेताहरू अहिले राजालाई लल्कार्दै छन्, राजा चुनाव लड्न आऊ भनेर । म भन्छु– तपाईंहरूसँग चुनाव हामी लड्छौँ, राजाले चुनाव लड्ने होइन । चुनाव लड्नको लागि हामीजस्ता मानिसहरू छौँ । हामीले खोजेको राजा, हामीले स्थापित गर्न खोजेको राजा तपाईंहरूसँग चुनाव लड्ने होइन । राजनैतिक दलको राजा होइन, देशको राजा खोजेको हो । राजा राजनीतिक दलभन्दा र भोटको राजनीतिभन्दा माथि रहने संस्था हो । 

फागुन २४ शनिबार ।
नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ले पूर्वराजा ज्ञानेन्द्रलाई पार्टी खोलेर चुनाव लड्न सुझाव दिएका छन् । उनले राजतन्त्र पुनःस्थापना हुने कुरा असम्भव भएको स्पष्ट पारे । आज बिहान रौतहट गरुडाका उद्योगी तथा व्यापारीसँगको भेटघाटका क्रममा सञ्चारकर्मीहरूले राखेका जिज्ञासाको उत्तर दिँदै अध्यक्ष दाहालले भने, “इतिहासको चर्खा कहिले पनि फर्कँदैन, यदि उहाँलाई सत्तामा आउने इच्छा भए पार्टी खोलेर, चुनाव जितेर आउन संविधानले छुट दिएको छ ।”

अर्को प्रसंगमा अध्यक्ष दाहालले गरुडामा रहेको श्रीराम सुगर मिल सञ्चालनको लागि सक्दो पहल गर्ने बताए । यस मिलसँग रोजगारी, आर्थिक विकास समेत जोडिएको हुँदा श्रीराम सुगर मिल सञ्चालनको लागि पार्टीको तर्फबाट सक्दो सहजीकरण गर्ने उनले प्रतिबद्धता जनाए

अध्यक्ष दाहालसहितको टोली माओवादी केन्द्रको जनतासँग माओवादी तराई–मधेस जागरण अभिायनअन्तर्गत शुक्रबार साँझ रौतहट आइपुगेका हुन् । शनिबार दिउँसो परोहा नगरपालिकाको लौकाहामा आमसभामा सम्बोधन गर्ने कार्यक्रम रहेको पार्टीका पोलिटब्युरो सदस्य एवं रौतहट क्षेत्र नं ४ क का प्रदेशसभा सदस्य युवराज भट्टराई ‘समीर’ले जानकारी दिए ।