काठमाडाैं । सर्लाही क्षेत्र नम्बर ४ मा रास्वपाका उम्मेदवार अमरेशकुमार सिंह अघि छन्। अहिलेसम्म भएको मतगणना अनुसार रास्वपाका सिंहले १२३९ मत ल्याएका छन्।

नेपाली कांग्रेसका उम्मेदवार गगन थापाले ७६८ मत ल्याएका छन् भने एमालेका उम्मेदवार अमनिशकुमार यादवले १९९ र नेकपा उम्मेदवार रजनिश रायले १८ मत ल्याएका छन्।

काठमाडाैं । काठमाडौं–१ बाट प्रतिनिधि सभा सदस्यमा निर्वाचित राष्ट्रिय स्वतन्त्र पार्टी (रास्वपा)की नेतृ रञ्जु न्यौपानेले वैकल्पिक राजनीतिको जित भएको प्रतिक्रिया दिनुभएको छ । शुक्रवार निर्वाचनको औपचारिक घोषणापछि सञ्चारकर्मीसँग कुरा गर्दै न्यौपानेले यस्तो प्रतिक्रिया दिनुभएको हो ।

उहाँले ३५–३६ वर्षदेखि बारम्बार मतदाताले नेपाली नागरिकलाई धोका दिनेहरुलाई ढोका बन्द गरिदिएको पनि बताउनुभयो । उहाँले आफूलाई बहुमतले निर्वाचित गराउने काठमाडौं–१ का मतदातालाई धन्यावाद समेत दिनुभयो । उहाँले आफूहरुको वास्तविक लडाइँ अब शुरु हुने पनि बताउनुभयो ।

उहाँले भन्नुभयो, ‘यो निर्वाचन विशेष परिस्थितिमा भएको हो । उम्मेदवार र पार्टीले विशेष रणनीति लिएका थियौं। मतदाताले पनि विशेष रुपमा प्रतिक्रिया दिनुभएको स्पष्ट देखियो । ३५–३६ वर्षदेखि बारम्बार मतदाता नेपाली नागरिकलाई धोका दिनेहरुलाई ढोका बन्द गरिदिन्छौं भनेर मतदाताले भनिदिनुभयो । यो हाम्रो लागि निकै सुखद कुरा हो । यो जित हाम्रा लागि चुनौतीपूर्ण पनि छ । यस्तो महत्वपूर्ण जित हाँसिल भएकाले अब काम गरेर देखाउनैपर्छ । रियल फाइट त अब शुरु हुँदैछ । काठमाडौं–१ का हरेक मतदातालाई कृतज्ञता व्यक्त गर्न चाहन्छु । यो वैकल्पिक राजनीतिको जित हो । यो विवेकशील राजनीतिको पनि जित हो ।’

उहाँले विवेकशील राजनीतिको समेत जित भएको प्रतिक्रिया दिनुभयो ।

काठमाडाैं । राष्ट्रिय स्वतन्त्र पार्टीका उपसभापति डोलप्रसाद अर्यालले नागरिकको लागि सरकार छ भन्ने अनुभुति गराउने जिम्मेवारी रास्वपामा आइरहेको प्रतिक्रिया दिनुभएको छ । पार्टीकाे काठमाडौं–१ बाट प्रतिनिधि सभा सदस्यमा निर्वाचित उम्मेदवार रञ्जु न्यौपानेलाई बधाई ज्ञापन गर्दै उहाँले यस्तो प्रतिक्रिया दिनुभएको हो ।

प्रारम्भिक मतगणनामा रास्वपाको पक्षमा लहर आएको भन्दै उहाँले अब मुलुकमा भ्रष्टाचारको अन्त्य गर्दै समृद्धि ल्याउनुपर्ने जिम्मेवारी समेत रास्वपाको काँधमा आइसकेको प्रतिक्रिया दिनुभयो ।

उहाँले भन्नुभयो, ‘हामी सबै जना मिलेर यो देशमा समृद्धि ल्याउनुपर्नेछ, सुशासन कायम गर्नुपर्नेछ । भ्रष्टाचार अन्त्य गर्नुपर्नेछ । जनतालाई डेलिभरी र डेभलपमेन्टको महशुस गराउनुपर्नेछ र जनतालाई मेरो लागि सरकार छ भन्ने अनुभूति गराउने जिम्मेवारी रास्वपामा आउँदै गरेको छ । साथ र सहयोगको लागि सबै मतदातामा धेरै धेरै धन्यावाद ।’

उहाँले देशभरका मतदातामा धन्यावाद समेत ज्ञापन गर्नुभयो ।

काठमाडाैं । गृहमन्त्री ओमप्रकाश अर्यालले हालै सम्पन्न प्रतिनिधि सभा सदस्य निर्वाचनले मुलुक, मानवता र संविधान जोगाएको बताउनुभएको छ । निर्वाचन निष्पक्ष, शान्तिपूर्ण र विगतको भन्दा निकै गुणस्तरीय भएको दाबी गर्दै उहाँले यसले राजनीतिक सुशासनको नयाँ मानक स्थापित गरेको बताउनुभएको हो ।

गृहमन्त्री अर्यालकाअनुसार यदि निर्वाचन हुन नसकेको भए देश, मानवता र संविधान सबै गम्भीर जोखिममा पर्ने अवस्था थियो । यस पटकको निर्वाचनमा रगतको एक थोपा पनि नबगेको उल्लेख गर्दै उहाँले वर्तमान सरकार गठन भएदेखि नै राजनीतिक हिंसाको अन्त्य भएको दाबी गर्नुभयो ।

विगतका निर्वाचनहरूमा धेरै ठाउँमा झडपका कारण मतदान स्थगन गर्नुपर्ने र पुनः चुनाव गराउनुपर्ने बाध्यता रहे पनि यसपटक देशभर एकैचोटी शान्तिपूर्ण रूपमा मतदान सम्पन्न भएको उहाँले जानकारी दिनुभयो । यसलाई चुनावी सरकारको ठूलो सफलता मान्दै उहाँले अब राजनीतिक सुशासनका लागि नयाँ मानक तय भएको स्पष्ट पार्नुभयो । सरकारले सफलतापूर्वक निर्वाचन सम्पन्न गराएको उहाँको भनाइ छ ।

काठमाडाैं । जुम्ला कनकासुन्दरी गाउँपालिकाको वडा नम्बर १, २, ३, ५, ६ र ७ को हालसम्म मत गणना हुँदा राष्ट्रिय प्रजातन्त्र पार्टीका उम्मेदवार ज्ञानबहादुर शाहीले फराकिलो अग्रता कायम गरेका छन् ।

प्रारम्भिक मत परिणाम अनुसार ज्ञानेन्द्र शाहीले २१ सय २ मत प्राप्त गर्दै पहिलो स्थानमा रहेका छन् । यस्तै, नेपाली कम्युनिस्ट पार्टीका नरेश भण्डारीले ९७२ मत ल्याउँदै दोस्रो स्थानमा रहेका छन्।

काठमाडाैं । प्रतिनिधि सभा निर्वाचन अन्तर्गत चितवन क्षेत्र नम्बर–२ मा राष्ट्रिय स्वतन्त्र पार्टी (रास्वपा) का अध्यक्ष रवि लामिछानेले फराकिलो अग्रता लिनुभएको छ ।

पछिल्लो मत गणना अनुसार रविले १०८२२, नेपाली कांग्रेसकी मीना खरेलले ३२२७, एमालेका अस्मिन घिमिरेले २८४६ र नेकपाका प्रताव गुरुङले १८४४ मत प्राप्त गर्नुभएको छ ।

रास्वपाले अहिलेसम्म एक स्थानमा विजय हासिल गरेकाे छ भने ७६ स्थानमा अग्रता कायम गरेकाे छ ।

काठमाडाैं । फागुन २१ गते सम्पन्न प्रतिनिधि सभा निर्वाचनको मतपरिणाम आउने क्रम सुरू भएको छ। ८८ स्थानमा अहिले मतगणना भइरहेको छ। दुई क्षेत्रको अन्तिम परिणाम प्राप्त भएको छ। रास्वपा र नेपाली कांग्रेसले एक-एक क्षेत्र जितेका छन्।

जारी मतगणनामा नेपाली कम्युनिष्ट पार्टीका ३ उम्मेदवारले अग्रता लिएका छन्। रुकुम पूर्वमा पुष्पकमल दाहाल ‘प्रचण्ड’ले अग्रता लिइरहेका छन्। प्रचण्ड नेपाली कम्युनिष्ट पार्टीका संयोजक हुन्।

प्रचण्डले ४ हजार ३ सय ९८ मत प्राप्त गर्दा कांग्रेसकी कुसुमदेवी थापाले १ हजार २ सय ६१ मत प्राप्त गरेकी छिन्। नेकपा एमालेका लिलामणी गौतमले ९ सय ७ र रास्वपाका लखनकुमार थापाले ३ सय ५४ मत प्राप्त गरेका छन्।

काठमाडाैं । म्याग्दीमा प्रतिनिधि सभा निर्वाचनका लागि स्वतन्त्र उम्मेदवार महावीर पुनले अग्रता लिएका छन्।

मुख्य निर्वाचन अधिकृत सूर्यबहादुर थापाका अनुसार २८१३ मत गणना भएको छ। त्यसमध्ये २६२६ मत सदर र १८७ मत बदर भएको छ।

अग्रता लिएका महावीर पुनले १०६६ मत प्राप्त गरेका छन्। नेकपा एमालेका हरिकृष्ण श्रेष्ठ दोस्रो स्थानमा छन्। उनले ६१२ मत प्राप्त गरेका छन्।

त्यस्तै नेपाली कम्युनिष्ट पार्टीका अर्जुनबहादुर थापाले ४७२ मत प्राप्त गरेका छन्।

काठमाडाैं । मुस्ताङमा नेपाली कांग्रेसका उम्मेदवार याेगेश गाैचन थकाली विजयी भएका छन् । एक मात्र निर्वाचन क्षेत्र भएकाे मुस्ताङमा थकालीले नेकपा एमालेका उम्मेदवार इन्द्रधारा डादु विष्टलाई पछि पार्दै विजयी भएका हुन् ।

निर्वाचन कार्यालयका अनुसार थकालीले तीन हजार तीन सय सात मत प्राप्त गरेका छन् भने प्रतिस्पर्धी एमालेका विष्टले एक हजार ८ सय ६ भाेट प्राप्प गरेका छन् ।

काठमाडाैं । काठमाडौं निर्वाचन क्षेत्र नम्बर १ मा राष्ट्रिय स्वतन्त्र पार्टी (रास्वपा) की उम्मेदवार रञ्जु न्यौपाने फराकिलो मतान्तरसहित विजयी हुनुभएको छ ।  उहाँको जितसँगै रास्वपाकी नेतृ समीक्षा बाँस्कोटाले वैकल्पिक राजनीति औपचारिक रूपमै मूलधारको परिवर्तनकारी शक्तिमा रूपान्तरण भएको बताउनुभएको हो ।

मतगणनास्थलमा सञ्चारकर्मीहरूसँग कुरा गर्दै नेतृ बाँस्कोटाले १० वर्ष लामो वैकल्पिक राजनीतिको अभियानले आज सार्थकता पाएको बताउनुभयो । काठमाडौं–१ मा रास्वपाको ‘घण्टी’ चुनाव चिन्हमा १५ हजार ४ सय ५५ मत प्राप्त गर्दै रञ्जु न्यौपाने विजयी हुनुभयो ।

उहाँका निकटतम प्रतिद्वन्द्वी नेपाली काँग्रेस (रुख) ले ६ हजार ३ सय ६४ मत प्राप्त गरेको छ । त्यस्तै, राष्ट्रिय प्रजातन्त्र पार्टी (हलो) ले ३ हजार ९ सय ६२ र नेकपा एमाले (सूर्य) ले १ हजार ६१८ मत प्राप्त गरेका छन् ।

नेतृ बाँस्कोटाले २०७४ सालमा वैकल्पिक राजनीतिको बीउ रोप्ने व्यक्तिले नै आज विजय प्राप्त गरेको भन्दै खुशी व्यक्त गर्नुभयो।

काठमाडाैं ।  काठमाडाैं-१ बाट राष्ट्रिय स्वतन्त्र पार्टीकी रञ्जु दर्शनाले विजय हासिल गरेकी छन् । उनले १५ हजार ४५५ मत ल्याएर प्रतिनिधि सभा सदस्यमा निर्वाचित भएकी हुन्। औपचारिक घाेषणा हुन भने बाँकी छ ।

दर्शनाका निकटत्तम प्रतिस्पर्धी नेपाली कांग्रेसका प्रबल थापाले ६ हजार ३६४ मत प्राप्त गरेका छन् ।

यसअघिका निर्वाचनमा कडा टक्कर दिँदै आएका राष्ट्रिय प्रजातन्त्र पार्टीका वरिष्ठ उपाध्यक्ष रवीन्द्र मिश्रले ३ हजार ९७२ मत ल्याएर तेस्राे स्थानमा छन् भने चौथो स्थानमा रहेका नेकपा एमालेका मोहन रेग्मीले १ हजार ६१८ मत प्राप्त गरेका छन्।

काठमाडाैं । फागुन २१ गते भएको प्रतिनिधि सभा निर्वाचनको मतपरिणाम आउने क्रम जारी छ। अहिलेसम्म ६२ निर्वाचन क्षेत्रको मतगणना सुरू भएको छ।

अहिलेसम्म राष्ट्रिय स्वतन्त्र पार्टीले ४७ स्थानमा अग्रता लिइरहेको छ। नेपाली कांग्रेस र नेकपा एमालेल ५–५ निर्वाचन क्षेत्रमा अग्रता लिएका छन्। नेकपा एमालेका भानुभक्त ढकालले तेह्रथुम – १ बाट २ हजार ४८० मतसहित अग्रता लिइरहेका छन्।

नेपाली कांग्रेसका सन्तोष सुब्बाले २ हजार ३१७ मत सहित पछ्याइरहेका छन्। रास्वपाका सुरेन्द्र कार्की १ हजार ९ सय ७१ मतसहित तेस्रो स्थानमा छन्।

चितवन १ मा नेकपा एमालेका दावा दोर्जे लामा अगाडि छन्। उनले हालसम्म ३९८ मत प्राप्त गरेका छन्। नेपाली कांग्रेसका राजेन्द्रप्रसाद वुर्लाकोटी ३३२ र रास्वपाका हरि ढकाल २६१ मत ल्याएका छन्।

मुस्ताङ १ मा नेकपा एमालेका इन्द्र धारा डादु विष्टले अग्रता लिइरहेका छन्। उनले हालसम्म २ हजार ५५७ मत प्राप्त गरेका छन्। नेपाली कांग्रेसका योगेश गौचन थकालीले १ हजार ३२३ मत सहित पछ्याइरहेका छन्। अघिल्लो निर्वाचनमा योगेश मुस्ताङबाट विजयी भएका थिए।

रूपन्देही ४ मा पनि नेकपा एमालेका प्रमोदकुमार यादवले अग्रता लिएका छन्। उनले ३ हजार ९११ मत प्राप्त गरेका छन्। नेपाली कांग्रेसका आशुतोष मिश्रले ३ हजार १ सय ७२ मत सहित पछ्याइरहेका छन्।

बाँके २ मा पनि नेकपा एमालेका मोहम्मद इश्तियाक राईले अग्रता लिइरहेका छन्। उनले हालसम्म ४ हजार ९२७ मत पाएका छन्। नेपाली कांग्रेसका सुधान्सु कोइरालाले ३ हजार ९८४ मत प्राप्त गरेका छन्।

काठमाडाैं । ११६ औँ अन्तर्राष्ट्रिय महिला दिवसको अवसर पारेर काठमाडौं महानगरपालिकाले महिला नेतृत्वका अनुभव, सिकाई र सङ्घर्षका विषयमा महिला विशेष कार्यक्रम आयोजना गर्ने भएको छ ।  महानगरपालिकाका प्रवक्ता नविन मानन्धरले शुक्रवार आयोजित पत्रकार सम्मेलनमा यसबारे जानकारी दिनुभएको हो ।

फागुन २४ गते राष्ट्रिय सभा गृहमा विशेष कार्यक्रम आयोजना गर्न लागिएको उहाँले बताउनु भयो । यस वर्षको अन्तर्राष्ट्रिय महिला दिवसको राष्ट्रिय नारा ‘महिला बालबालिकाका लागि अधिकार न्याय र कार्यसहितको अवसर’ तय भएको छ । यसै सन्दर्भमा महानगरले ‘पावर इन एक्सनः हर टाइम इज नाउ’ शिर्षकमा कार्यक्रम गर्न लागेको प्रवक्ता मानन्धरले बताउनु भयो । कार्यक्रमको उद्घाटन अन्तरिम सरकारका प्रधानमन्त्री सुशीला कार्कीले गर्नुहुनेछ ।

कार्यक्रममा प्रशासन, कानून, समाज, उद्यम, उद्योग तथा वाणिज्य, नवप्रवर्तन र हक अधिकारका क्षेत्रमा नेतृत्व गरिरहेका महिलाहरूले आफ्ना अनुभव सुनाउने उहाँले बताउनु भयो । राज्य प्रणालीको उपल्लो ओहोदादेखि सामान्य जीवनयापनका पद्धतिसम्मका अनुभवहरू कार्यक्रममा समेटिने उहाँको भनाइ छ ।

कार्यक्रममा ‘एक वडा एक नमूना उद्यम’ कार्यक्रम अन्तर्गतका पौरखी महिलाहरूको प्रतिनिधित्वमूलक जीवन्त कला प्रदर्शनी गरिनेछ । नेपालको महिला आन्दोलन तथा अधिकारका सङ्घर्षका उदाहरणीय महिला नेतृत्वहरूका विषयमा विवरण प्रदर्शन गरिनुका साथै क्युआर कोडमा आधारित प्रश्नावलीमार्फत सहभागीहरूबाट पृष्ठपोषण समेत सङ्कलन गरिने महानगरले जनाएको छ ।

लैङ्गिक समानता र न्यायका लागि ६ वटा कानून
पत्रकार सम्मेलनमा प्रवक्ता मानन्धरले लैङ्गिकमैत्री शहरी व्यवस्थापन र हिंसा न्युनिकरणका लागि महानगरले हालसम्म ६ वटा स्थानीय कानून तर्जुमा गरी राजपत्रमा प्रकाशन गरिसकेको जानकारी दिनुभयो । जसमा विवाद निरूपण कार्यविधि २०७५, मानव बेचबिखन ओसारपसार नियन्त्रण कार्यविधि २०७८, वडा महिला सञ्जाल सञ्चालन कार्यविधि २०७९, लैङ्गिक हिंसा निवारण कोष सञ्चालन कार्यविधि २०७८, मेलमिलाप केन्द्र सञ्चालन निर्देशिका २०७९ र कानुन सहायता कार्यविधि २०८० रहेका छन् ।
यी कानून कार्यान्वयन गर्न न्यायिक समिति, वडा महिला सञ्जाल, मेलमिलाप कक्ष लगायतका संयन्त्र निर्माण गरिएका छन् । सबै वडामा मेलमिलाप कक्ष र महिला सञ्जाल गठन गरी केन्द्र र वडास्तरमा न्यायिक सहजकर्ता तथा विज्ञ कानून व्यवसायीमार्फत निःशुल्क कानूनी सहायता प्रदान गरिँदै आएको प्रवक्ता मानन्धरले बताउनुभयाे।

पत्रकार सम्मेलनका क्रममा बोल्दै महानगरकी कार्यवाहक प्रमुख सुनिता डंगोलले कार्यक्रमबाट प्राप्त हुने सुझावले महानगरपालिकाको आगामी नीति, योजना तथा कार्यक्रमलाई तथ्यमा आधारित बनाउन सहयोग पुग्ने विश्वास लिइएको बताउनु भयो । उहाँले सबैलाई कार्यक्रममा उपस्थित हुन पनि आग्रह गर्नुभयो ।

डंगोलले महिला भएकै कारण नेतृत्वमा भेदभाव र दुव्र्यवहार भोग्नुपर्ने अवस्थाको अन्त्य गर्दै हिंसा मुक्त र समतामूलक समाज निर्माण गर्न कार्यक्रम फलदायी हुने महानगरपालिकाको अपेक्षा रहेको बताउनुभयो ।

सर्लाही । सर्लाही क्षेत्र नं. ४ को मतगणना भर्खरै सुरु भएको छ । निर्वाचन अधिकृत विनोदप्रसाद घिमिरेका अनुसार शुक्रबार बिहान १०ः२० बजेदेखि मतगणना सुरु भएको हो ।

गोडैता बजारस्थित बेणी भोला नमूना माध्यमिक विद्यालय गोडैतामा मतगणना सुरु भएको हो । सर्लाही ४ मा एक लाख २१ हजार १२ मतदातामध्ये ७७ हजार ९३१ म्त खसेको निर्वाचन अधिकृतको कार्यालयले जनाएको छ ।

सर्लाही ४ बाट नेपाली कांग्रेसका सभापति गगनकुमार थापा, राष्ट्रिय स्वतन्त्र पार्टीका डा. अमरेशकुमार सिंहलगायत प्रतिस्पर्धामा हुनुहुन्छ ।

काठमाडाैं । चितवन-३ मा रास्वपाकी उम्मेदवार सोबिता गौतमले मतान्तर एक हजार कटाएकी छन्। सात हजार ७०८ मतगणना हुँदा रास्वपाकी गौतमले ३ हजार ६९३ मत पाएकी छन्।

नेपाली कम्युनिस्ट पार्टी (नेकपा) की रेनु दाहालले २ हजार २६३ मत पाएकी छन् भने एमालेका शंकर थपलियाले ७४१ मत ल्याएका छन्।

काठमाडाैं । प्रतिनिधिसभा चुनावअन्तर्गत मतगणना जारी रहँदा राष्ट्रिय स्वतन्त्र पार्टीले फराकिलो अग्रता लिएको छ ।
झापा क्षेत्र नम्बर ५ को प्रारम्भिक मतगणना अनुसार राष्ट्रिय स्वतन्त्र पार्टी रास्वपाका वरिष्ठ नेता बालेन साह नेकपा एमाले अध्यक्ष केपी शर्मा ओलीभन्दा दोब्बर भन्दा बढी मतले अगाडि हुनुहुन्छ ।

पछिल्लो मत परिणाम अनुसार साहले १ हजार ४ सय ७८ मत प्राप्त गर्दा ओलीले ३ सय ८४ मत पाउनु भएको छ । तेस्रो स्थानमा श्रम संस्कृति पार्टीका समीर तामाङ हुनुहुन्छ । काठमाडौंका १० वटै निर्वाचन क्षेत्रमै रास्वपाका उमेदवारले अग्रता लिएका छन् । काठमाडौं–१ मा रञ्जु दर्शना, २ मा सुनील केसी, ३ मा राजुनाथ पाण्डे र ४ मा पुकार बमले सुरवाती अग्रता लिनु भएको छ ।

त्यस्तै काठमाडौ ५ मा सस्मित पोखरेल, ६ मा शिशिर खनाल, ७ मा गणेश पराजुली, ८ मा विराजभक्त महर्जन, ९ मा डीपी अर्याल र १० मा प्रदीप विष्ट अगाडि हुनुहुन्छ । रास्वपाले झापा २,मोरङ ४ र ५, धनुषा ३,महोत्तरी १, रौतहट ४, बारा १ र ३, ललितपुर ३,भक्तपुर १ र २ , चितवन २ र चितवन ३ ,तनहुँ १, स्याङ्जा १, कास्की १ , २ र ३, पाल्पा १, रुपन्देही २, ३ र ५ ,दाङ १
बाँके १ र ३ तथा कञ्चनपुर २, ३ स्थानमा अग्रता लिएको छ ।

नेपाली कांग्रसले ललितपुर १,मुस्ताङ १ र कपिलवस्तु ३मा तथा नेकपा एमालेले तेह्रथुम १, रुपन्देही ४ र बाँके २ मा सुरुवाती अग्रता लिएका छन् । यसैगरी नेपाली कम्युनिस्ट पार्टी रुकुम पूर्व १ र कालीकोट १ मा अगाडि छ ।