सिन्धुली, १४ भदौ । नेपाल विद्युत् प्राधिकरण सिन्धुलीले विद्युत् चोरी गरिरहेको अवस्थामा खुर्कोटको एउटा होटलबाट विद्युतीय उपकरण बरामद गरेको छ ।

सिन्धुलीको गोलन्जोर गाउँपालिका–७, खुर्कोटमा रहेको थकाली होटलले विद्युत चोरी गरेको पाइएपछि पानी तान्ने मोटर, टिभी, दुईवटा डिप फ्रिज, टेबल फ्यानलगायतका विद्युतीय सामग्री जफत गरिएको प्राधिकरणले जनाएको छ । होटलले राति ९ बजेबाट विद्युत् चोरी गर्ने गरेको पाइएको प्राधिकरणका सिन्धुली शाखा प्रमुख योगेन्द्र ठाकुरले जानकारी दिएका हुन् । होटलले एक लाखभन्दा बढी बक्यौता नतिरेपछि एक महिनाअघि प्राधिकरणले होटलको विद्युत लाइन काटिदिएको थियो ।

होटल सञ्चालकलाई विद्युत् चुहावट नियन्त्रण विनियमावलीअनुसार कारबाही हुने प्राधिकरणले जनाएको छ ।