एजेन्सी,२३ असोज । इजरायल–हमास युद्ध इजरायलमा प्यालेस्टिनी लडाकू समूह हमासले गरेको अकस्मात आक्रमणमा परी ८०० भन्दा बढी व्यक्तिको मृत्यु भएको छ। तीमध्ये ४० विदेशीको पनि मृत्यु भएको छ भने धेरै घाइते भएका छन् । मारिनेमा अधिकांश इजरायली थिए ।
धेरै बेपत्ता विदेशीहरू दक्षिणी इजरायली मरुभूमिमा भएको कन्सर्टमा उपस्थित थिए, जहाँ सयौं मानिसहरूको हत्या गरिएको थियो। संयुक्त राज्य अमेरिकाले सोमबार ११ जनाको मृत्यु भएको पुष्टि गरेको छ । अन्य केही अझै बेपत्ता रहेको बताएको छ । राष्ट्रपति जो बाइडेनले प्यालेस्टिनी इस्लामी समूह हमासले इजरायलमा गरेको आक्रमणपछि मारिनेमा कम्तीमा ११ अमेरिकी नागरिक रहेको बताएका छन् । उनले एक विज्ञप्तिमा भनेका छन्,वाशिंगटनले विश्वास गर्छ कि हमासले बन्धक बनाएका मध्ये अमेरिकी नागरिकहरू पनि छन्।
थाइल्याण्डको विदेश मन्त्रालयका प्रवक्ता कञ्चना पत्राचोकले १२ थाई कामदारको मृत्यु, आठ घाइते र ११ जनालाई बन्धक बनाइएको बताइन्।त्यसैगरी,इजरायलमा हमासको आक्रमणमा परी १० नेपालीको मृत्यु भएको छ । यी मानिसहरू हमास आक्रमणको मुख्य केन्द्रबिन्दु किबुट्ज अलुमिममा बस्थे।
युक्रेनी विदेश मन्त्रालयका प्रवक्ता ओलेग निकोलान्कोले इजरायलमा बस्ने दुई युक्रेनी महिलाको आक्रमणमा मारिएको बताए । फ्रान्सेली सरकारले इजरायल र हमासको आक्रमणलाई लिएर विज्ञप्ति जारी गरेको छ। इजरायल विरुद्ध हमासको आतंककारी आक्रमणमा दुई फ्रान्सेलीको मृत्यु भएको सरकारले जनाएको छ। तेल अवीवमा एक रूसी नागरिकको मृत्यु भएको छ र चार जना बेपत्ता भएको रूसी दूतावासले बताएको छ ।
बेलायतका लागि इजरायलका राजदूतले हमासको आक्रमणमा एक बेलायती नागरिकको मृत्यु भएको र अर्का एकजना बेपत्ता भएको बताएका छन् । क्यानडा सरकारले आफ्ना एक नागरिकको मृत्यु भएको र दुई जना बेपत्ता भएको बताएको छ । यसै क्रममा कम्बोडियाका प्रधानमन्त्री हुन मानेटले यस आक्रमणमा एक कम्बोडियाली विद्यार्थीको मृत्यु भएको बताएका छन् ।
